Chuca Chups amplía a setiembre les negociaciones colos trabayadores

MADRID 31 Ago. (EUROPA PRESS) -

Chuca Chups decidió ampliar el periodu de consultes ente la empresa y los representantes llegales de los trabayadores de la factoría asturiana de Villamayor, nel conceyu de Piloña. El zarru de la planta taba previstu de mano pal día 1 de setiembre.

D'esta miente, fontes de la compañía indicaron a Europa Press que les negociaciones van retomase en setiembre, dientro d'un procesu de negociación qu'entamó'l pasáu mes de xunu.

El divorciu ente trabayadores asturianos y directiva entamó'l cuando la compañía anunció'l zarru de la planta piloñesa pa centrar tola producción na factoría de Sant Esteve Sesrovives, en Barcelona. Seis díes dempués, los trabayadores empecipiaron un calendariu de paros y movilizaciones pa protestar escontra'l zarru.

El 9 de xunu, el Gobiernu rexonal asturianu entró n'escena al traviés del so conseyeru d'Industria y Empléu, Graciano Torre, el qu'indicó que'l Principáu reclamaría a la compañía la devolución de 5 millones d'euros n'ayudes si siguía cola so decisión d'abandonar Asturies.

Tan solo un día más tarde, el 10 de xunu, fontes de la compañía indicaben a Europa Press que la decisión de dexar suelu asturianu yera "irreversible", y que se trataba d'una midida "fondamente meditada", en considerando que, con dos plantes, la capacidá de producción "ta sobredimensionada". Mentanto, representantes de compañía y sindicatos siguieron tratando d'averar postures.

Les negociaciones enllargáronse tol mes de xunetu con alcuentros ente dambes partes, col discutiniu del plan social presentáu por Chuca Chups como exe de discutiniu. Finalmente'l día 26 de xunetu, la compañía dio un ultimatum a los trabayadores y dio como plazu hasta'l día 26 xunetu pa rematar el periodu de consulta si los trabayadores nun aceptaben el plan social.

Llegáu'l día, los sindicatos solicitaron que'l Plan Social incluyera'l treslláu de la totalidá de la plantiya a Barcelona en llugar de los 68 trabayadores propuestos pola empresa.