El Simpa fai "un balance mui positivu" de la selmana de fuelga y llamenta "fonderamente" la negativa del Sespa a negociar
UVIÉU, 27 de Marzu (EUROPA PRESS)
El Comité de Fuelga de los mélicos de les Urxencies hospitalaries decidió güei proponer el próximu llunes a la Estaya d'Urxencies del Sindicatu Mélicu Profesionales d'Asturies (Simpa) entamar los trámites pa volver convocar xornaes de paru nes dos últimes selmanes d'abril ante la "negativa" del Serviciu de Salú del Principáu (Sespa) de negociar les condiciones llaborales de los facultativos d'estos servicios asistenciales.
Según indicó a Europa Press el voceru del Simpa, Antonio Matador, la negociación "ye exixible por llei", dixo en referencia al real decretu-llei sobre Rellaciones de Trabayu de 1977. Sin embargu, refugó los argumentos del Gobiernu del Principáu de nun negociar al autoescluyise'l Simpa del acuerdu sobre la reforma sanitaria soscritu ente'l Sespa y los sindicatos CC.OO y UXT y llamentó "fonderamente" la so actitú. "Dicen que l'acuerdu tien rangu de norma, pero nun ye verdá porque nin siquier ta publicáu nel BOPA", apuntó Matador. Asina, el Simpa espera que ante una nueva convocatoria de fuelga "el Sespa reflexone y decida negociar".
BALANCE POSITIVU DE LA FUELGA
En cuanto al desarrollu d'esta selmana de fuelga, dende'l Simpa se fai un "balance mui positivu" ante l'alta participación del personal d'Urxencies. "Los mélicos participaron na fuelga en casi'l 100% de los casos, y el restu de personal tamién prestó la so collaboración", dixo Matador.
Amás, quiso agradecer la "comprensión" de los pacientes que "en tou momentu fueron trataos, como siempre, col máximu rigor". Sobre les actividaes que los facultativos dexaron de facer demientres esta selmana, tanto docentes, como investigadores y alministrativos, Antonio Matador señaló que "anque fueron sólo cinco díes tuvieron repercusión". N'especial, refirióse a les llistes d'espera y dixo que "s'incrementaron".
