El Conceyu por Otra Función Pública diz que'l Principáu gastó esti añu más de cinco millones d'euros n'asesores

UVIÉU, 14 d'Abril (EUROPA PRESS)

El Conceyu por Otra Función Pública n'Asturies acusó güei al Gobiernu autonómicu asturianu de gastar esti añu más de cinco millones d'euros en caltener los más de 100 puestos d'asesores y coordinadores que caltién activos nes diferentes partes de l'Alministración.

Al traviés d'un comunicáu, el Conceyu declaró que "el xorrecimientu continuu del enfotu personal y políticu como criteriu de seleición n'Alministración del Principáu d'Asturies supunxo la creación nos caberos tres años de más de 100 nuevos puestos sobre la denominación de Coordinador o Asesor, de nivel 26 o superior, asitiaos, nos más de los casos, ente les Xefatures de Serviciu y de Seición, toos ellos nomaos a deu".

Según el colectivu, el coste económicu que supón "caltener esta nueva estructura de 100 puestos d'élite nel añu 2009 ronda los cinco millones d'euros; demientres, el populismu del Gobiernu amenaza a la 'tropa de funcionarios' cola conxelación salarial".

Amás, según el comunicáu, "un esame sollerte de les funciones y característiques de talos puestos evidencia que los más d'ellos nun respuenden a necesidaes oxetives derivaes del serviciu públicu -necesidaes que, d'otra miente, enxamás s'espresen nin xustifiquen nos alcuerdos de creación d'estos puestos- sinón más bien a una política de personal empobinada a la fidelización de los funcionarios escoyíos, que furrula como una castra de nuevu 'enfeudamientu' nel que l'emplegáu públicu vincúlase personalmente al políticu que lu noma".

"Neste sen", añadió, "son cada vegada más corrientes los ascensos darréu de la toma de posesión como nuevos funcionarios de carrera a puestos de llibre designación, nuna carrera profesional meteórica sofitada esclusivamente nel enchufe personal", acabó'l testu.