RIBESELLA, 04 de Mayu (EUROPA PRESS)
El conseyera de Cultura y Turismu del Principáu, Mercedes Álvarez González, asistió esti mediudía en Ribesella a l'abertura de la Selmana de les Lletres Asturianes que na so trixésima edición ta dedicada a la escritora Enriqueta González Rubín, la primer autora en publicar llibros de prosa n'asturianu. La responsable autonómica tuvo acompañada pola directora xeneral de Política Llingüística, Consuelo Vega Díaz.
La edición del 2009 va dedicase a Enriqueta González Rubín con un programa d'actos organizáu conxuntamente pol Principáu d'Asturies, l'Ayuntamientu de Ribesella -conceyu de nacimientu de la homenaxada- y l'Ayuntamientu de Llanes, onde esti mesmu añu se llocalizó un exemplar del llibru 'El viaxe del Tíu Pacho el Sordu a Oviedo', publicáu en 1875 y que ye la primer obra de narrativa publicada n'asturianu de manera autónoma.
Nacida en Santianes del Augua (Ribesella), en 1832, Enriqueta González Rubín exerció de maestra en Ribesella. Entamó a collaborar na prensa asturiana hacia 1860, faciéndose famosa darréu baxo los seudónimos de La Gallina Vieja, La Cantora del Sella o Una Aldeana del Sella. La mayor parte de la so producción lliteraria (artículos, cuentos y poemes) ta directamente emparetada cola de Fernán Caballero y les escritores en castellán de mediaos del sieglu XIX, y vio la lluz nel periódicu 'El Faro Asturiano', nel que llegó a publicar una novela por entregues. El director d'esti periódicu, Protasio González, incluyó nes sos 'Memorias Asturianas' (1880) dos relatos d'esta autora: "Una boda por amor' y 'Un indianu como hay pocos'.
La conseyera de Cultura y Turismu aprovechó l'abertura de la Selmana de les Lletres na Casa de la Cultura de Ribesella pa dar a conocer les actividaes que s'organizaron dende'l so departamentu en recuerdu d'Enriqueta González Rubín. Nel actu presentóse'l llibru 'Enriqueta González Rubín, el sinciu d'una escritora del XIX', un conxuntu d'estudios y ilustraciones que mos averen a la época, la vida y la obra de la escritora.
