Desactiváu'l Plan d'Emerxencies pol fueu declaráu na Reserva Natural de Muniel.los

UVIÉU 31 Ago. (EUROPA PRESS) -

El Principáu desactivó, a les 10.53 hores de güei martes, el Plan d'Emerxencies de Protección Civil por fueos Forestales del Principáu d'Asturies (Infopa) n'habiendo quedáo apagáu'l fueu que, dende ayeri llunes, afectaba a la Reserva Natural Integral de Muniel.los, según informaron el Gobiernu rexonal y el 112-Asturies.

La quema entamó na fastera sur de la reserva, a la vera del nucleu de La Viliel.la. Dada la importancia ambiental de la Reserva de la Biosfera de Muniel.los y teniendo en cuenta qu'había dos frentes, activóse l'Infopa en Nivel 1, baxándose a Nivel 0 a les 16.22 hores, n'apagando un de los focos y tener prácticamente controláu l'otru.

A la espera de realizar les midíes finales, valoróse que la superficie xamuscada foi d'unes 35 hectárees, mayoritariamente de monte rasu, ensin que se viere afectada la masa forestal de la reserva.

Al esistir nicios de que'l fueu foi provocáu, ayeri mesmu treslladáronse hasta la Reserva de Muniel.los efectivos de les Brigaes d'Investigación de Quemes Forestales (Bripas) y del Serviciu de Protección de la Naturaleza (Seprona) de la Guardia Civil pa empecipiar la investigación oportuna.

Nos llabores d'estinción, trabayaron 17 efectivos de Bomberos d'Asturies de les bases de Cangas ya Ibias; 16 persones de la Brigada de Refuerzu d'Incendios Forestales de Tinéu (BRIF), dependiente del Ministeriu de Mediu Ambiente, Mediu Rural y Marín; cinco helicópteros; 28 persones de cooperatives forestales; y trés guardes forestales. L'operativu tamién cuntó cola participación del personal del Centru de Coordinación Operativa (CECOP) del 112-Asturies.