Iniciativa Pol Asturianu celebra'l plan pilotu pa usar l'asturianu como llingua vehicular

Publicado: martes, 7 marzo 2017 18:54


UVIÉU, 7 de Marzu (EUROPA PRESS)

Iniciativa pol Asturianu mostró esti martes nuna nota de prensa'l so apoyu al plan pilotu que va entamase mientres el próximu cursu. Esta midida considérarla "un fechu positivu y que va na llinia de lo qu'ha ser un verdaderu procesu de normalización, magar qu'entamar en namás diez centros, dempués de cuasi cuarenta años de retrasu d'esti procesu, paez insuficiente y demasiao lento".

Sicasí, recordó que "l'asignatura de Llingua Asturiana vien tando en marcha dende 1984 de forma voluntaria en tolos niveles, inclusive compitiendo en secundaria con asignatures mui atractives, y que les families y l'alumnáu vienen acoyéndola con gran éxitu, magar les torgues puestes en dellos centros. Esto da una base bien esperanzadora pa la puesta en marcha del procesu d'introducción del asturianu como llingua vehicular d'otres asignatures".

Añadió qu'amás d'esti apoyu de les families "los sindicatos asturianos y estatales mostraron yá'l so apoyu a estes midíes. Agora ye importante planificar bien esti procesu, pa que seya esitosu, xenerar los materiales necesarios, la formación que'l profesoráu precise y la promoción afayadiza de la midida".

EDUCACIÓN INFANTIL

Tamién celebró iniciativa la noticia de la ufierta pal próximu cursu de l'asignatura de Llingua Asturiana n'Educación Infantil, que "vien acabar con una illegalidá, pues la Llei d'Usu del asturianu de 1998 determinaba la obligación pa l'alministración d'ufiertar l'asignatura en tolos niveles educativos".

"Ye necesario, pa cumplir dafechu la llexislación, qu'esta ufierta s'estienda a otros niveles onde entá nun llega, talos como la FP, FP básica y otros estudios reglaos qu'entá nun cuenten cola ufierta d'asturianu", añadió.

Amás, considera que "ye de suma importancia la reconocencia inmediata per parte del Ministeriu d'Educación de la especialidá docente d'asturianu pal profesoráu, que vive en condiciones llamentables de continua interinidá, xenerando situaciones que nun permiten garantizar la calidá del enseñu, con una gran inestabilidá".

Dende Iniciativa animen "a les families asturianes a reclamar nos sos centros que s'apliquen estes midíes, y recordamos que la llei garantiza que con qu'un solu alumnu o alumna quiera matriculase na asignatura, esta ha d'impartise nel centru, un modelu qu'habría estendese, como drechu humanu que ye, a la posibilidá de tener l'asturianu como llingua vehicular d'otres asignatures".

Asturianu ofrecido por