Israel ta dispuestu a ceder parte de Xerusalén a los palestinos

Reuters

MADRID, 1 de Setiembre (EUROPA PRESS)

El ministru de Defensa d'Israel, Ehud Barak, afirmó esti miércoles que l'Estáu hebréu ta dispuestu a ceder parte de Xerusalén a los palestinos nel marcu d'un acuerdu de paz, unes declaraciones que fizo poco primero qu'empezaren les conversaciones cara a cara ente les partes en Washington.

La partición de Jerusalén, un asuntu central nel conflictu ente israelinos y palestinos, incluyiría "un réxime especial" pa xestionar los llugares sagraos de la ciudá, según declaró Barak al diariu 'Haaretz' nuna entrevista na que sorrayó que l'asesinatu de cuatro israelinos esti martes en Cixordania a manes de palestinos armaos nun tendría que torgar l'entamu de les negociaciones de paz.

"Xerusalén Este y doce barriso xudíos qu'acueyen a 200.000 residentes van ser nuesos. Los barrios árabes nos que viven cerca d'un cuartu de millón de palestinos van ser suyos", esplicó'l ministru, que contribuyó a allanar el camín pal conceyu d'esti miércoles na Casa Blanca ente'l primer ministru israelín, Benjamin Netanyahu, y el presidente palestín, Mahmud Abbas.

"Va haber un réxime especial xunto con disposiciones acordaes na Ciudá Vieya, el Monte de los Olivos y la Ciudá de David", precisó. Na Ciudá Vieya alcuéntrase la mezquita d'A'l Aqsa, que ye una de les más importantes pa los musulmanes de tol mundu y ta xunto a la Muria de los Llamentos, el sitiu más sagráu del xudaísmu y última güelga, según la opinión popular, del Templu de Xerusalén.

Israel arrampuñó la zona oriental de la ciudá a Xordania na guerra de 1967 y depués anexonósela, anque la comunidá internacional nun reconoció esta acción. Los palestinos quieren que Xerusalén Este seya la capital del futuru Estáu que pretenden formar con Cixordania y la Franxa de Gaza.

La propuesta de Barak d'establecer dos ciudaes y crear un réxime especial nos llugares sagraos recuerda a un plan que presentó'l predecesor de Netanyahu nel cargu, Ehud Olmert, mientres les conversaciones de paz que caltuvo con Abbas, que fracasaron hai casi dos años.

Per otru llau, el ministru indicó que cualquier acuerdu que s'algame establecería que los puestos d'avanzada xudíos aislaos asitiaos en Cixordania treslladaríense a Israel, qu'acoyería asentamientos urbanos más grandes. Amás, l'acuerdu tendría que garantizar la seguridá d'Israel, lo qu'incluyiría una presencia a lo llargo del valle del Xordán (la frontera oriental de Cixordania) y "acuerdos tecnolóxicos", según Barak.