L'Asociación de Vecinos de Xivares exixirá responsabilidaes a HC y a Mediu Ambiente pol vertíu de fuel

UVIÉU, 27 de Xunu (EUROPA PRESS)

L'Asociación de Vecinos de Xivares 'El Tranqueru' va esixir responsabilidaes a HC Enerxía y a la Conseyería de Fomentu, Ordenación del Territoriu y Mediu Ambiente pol vertíu de fuel que se produxo ayeri na ría d'Aboño, por mor de la rotura d'una tubería na central térmica, propiedá de la eléctrica.

"La primer responsable ye la empresa Hidrocantábrico, tristemente conocida por ser una de les térmiques más contaminantes d'Europa" y yelo "combayando cola Conseyería", que dio'l vistu bonu a una Autorización Ambiental Integrada, caltuvo l'asociación al traviés d'un comunicáu.

A esto debe sumase, añadió, el nun tener prevista una balsa de contención en casu d'accidente, el retrasu na intervención, la non colocación de barreres nel orixe de la fuga y los métodos de la nave de salvamentu marítimu que "espardía les manches pasando repitíes veces por elles col motor revolucionáu".

Ante esta situación, encamentó llevar a cabu llabores de llimpieza nos arenales y cantiles afectaos, y a indemnizar económicamente a los afectaos pola reducció nde l'actividá industrial, comercial y turística que va causar el vertíu. Amás d'a poner en marcha midíes correctores a les empreses contaminantes.

Paralelamente, l'asociación vecinal "va personase xudicialmente como damnificada polos fechos" y, esti xueves, la Xunta Directiva va reunise col so abogáu, Roberto Roces, pa "entamar los trámites y dar forma a la denuncia". Amás anunciaron que van estudiar entamar otres actuaciones.