UVIÉU, 06 de Marzu (EUROPA PRESS)
L'Ayuntamientu de L.lena anunció güei que tamién va valorar el conocimientu de llingua asturiana como méritu nes sos oposiciones, igual que va facer el de Cangas del Narcea, según el Plan de Normalización d'esti últimu conceyu, aprobáu esta mesma selmana.
Al traviés d'una nota prensa, el gobiernu llocal de L.lena mostró'l so apoyu a la midida de Cangas y anunció que también va "facer lo mesmo", amás de "animar a tolos conceyos d'Asturies que lo faigan y s'apunten esti tipu d'iniciatives".
"Dende'l gobiernu de L.lena, tamos totalmente d'alcuerdu con tener en cuenta la formación de llingua asturiana o gallego-asturianu pa poder trabayar nes alministraciones públiques, nesti casu nel propiu ayuntamientu", afirmó la nota. El comunicáu esplica qu'en L.lena tán agora "cola catalogación de puestos de trabayu que va tar acabada pal mes de xunu, y dempués de la mesma, van vese les necesidaes del Conceyu pa poder convocar una ufierta pública d'empléu, y una de las cuestiones que se van tener en cuenta dende yá mesmo ye la de valorar la formación de llingua asturiana pa les places que pudieren salir".
CON "APOYU" POPULAR
"Hasta agora", añade'l Gobiernu llocal, "l'asturianu en L.lena cuenta col apoyu de la xente: toles campañes que se tán faciendo col comerciu, escueles, hostelería y servicios municipales, tuvieron mui bona acoyida". Como exemplu explica qu'otros conceyos llamaron pa pidir materiales de dalguna de les campañes. Tamién añadió que s'algamó qu'a los comercios de La Pola yá nun faiga falta repartí-yos el cartelu de Rebaxes, porque ellos mesmos lu van a pidir pa ponelu nel casu de que nun tuvieren el del añu pasáu.
"Y en cuanto al procesu de normalización institucional", afirma, "los trabayadores ven mui positivu l'emplegu de la llingua asturiana nos documentos oficiales, y nel día a día de la vida municipal, hasta tal puntu que munchos demanden formación específica pa tornar, y en xeneral hai bonos resultaos, sin imposiciones nin prexuicios de nengún tipu", recalcó.
Según el comunicáu, "nun se trata de neguna imposición, les alministraciones públiques tienen que conocer les llingües que se falen nos sitios onde se trabaya. El ciudadanu ye'l qu'escueye la llingua que quier emplegar y dende les alministraciones públiques, los trabayadores tienen que garantizar esi usu".
RESPUESTA A LES CRÍTIQUES
L'Ayuntamientu refugó les crítiques a la midida de Cangas, espresaes polos sindicatos de la zona como pola conseyera d'Alminitraciones Públiques, Ana Rosa Migoya, según les que la midida ye discriminatoria y illegal. Pal Ayuntamientu, "les pallabres de los sindicatos de Cangas son desafortunaes, puesto que nun se trata de discriminar a naide, sinón tolo contrario, de poder avanzar nos procesos de normalización social de la llingua asturiana". "Ye necesario valorar estos conocimientos pa que se puean poner en práctica. Paezmos que la que ta discriminada agora ye la xente que tien esa formación y que nun se valora". "Nun se pue valorar l'usu de la llingua sólo naquellos aspectos en rellación coles funciones del puestu de trabayu determináu, ye dicir, pa los Servicios de Normalización o p'actos como la selmana de les lletres", añadió.
Sobre Ana Rosa Migoya, l'Ayuntamientu de l.lenizu diz que "nun conoz dafechu la Llei d'Usu, y yera bono que-y echare una güeyada". "Paezmos que lo que'l gobiernu tien que facer ye entamar d'una vez por toes col funcionamientu de la Dirección Xeneral de Política Llingüística pa desendolcar los compromisos del alcuerdu de gobiernu: dir afitando cuestiones demandaes pola Rede de Normalización Llingüística del Principáu d'Asturies, creación d'un órganu de torna, pa que los Conceyos pudieren trabayar y avanzar nos procesos de normalización social ya institucional".
"Del Partíu Popular nun vamos dicir nada nuevo que nun se sepa; nuevamente refuguen la llingua asturiana o gallego-asturianu hasta que seyan otra vuelta les elecciones y vuelvan col so discursu fariséu y engañosu d'apuntase pa dempués, dexalo morrer. Teníen que mirar pa los sos socios de Galicia y deprender dalgo d'ellos", acabó'l comunicáu.