Les negociaciones ente Chupa Chups y el comité d'empresa volverán entamar el vienres

UVIÉU, 1 de Setiembre (EUROPA PRESS)

L'Hotel Cristina de Noreña va ser la sede'l vienres día 3 de setiembre a les 9.30 hores d'una nueva xunta ente la empresa, comité y sindicatos de Chupa Chups pa tratar l'espediente de zarru de la planta de Villamayor (Piloña), promovíu pola empresa. La so negociación prorrogóse hasta'l próximu 17 de Setiembre, según informó la Federación Agroalimentaria de CC.OO.

Esta prorroga impidió'l zarru previstu pal 1 de Setiembre y a la vista de los nuevos plazos de negociación la intención de la empresa de zarrar la planta, si a la fin nun s'algama facer cambiar d'opinión, quedaría aplazada, polo menos, hasta los primeros díes d'ochobre, según CCOO.

Dempués del zarru de les negociaciones el día 17, va remitise a la Dirección Xeneral de Trabayu del Principáu d'Asturies, dependiente de la Conseyería d'Industria, el resultáu final de dicha negociación y, en casu de desacuerdu, la representación de los trabayadores va presentar un contrainforme. La Dirección Xeneral de Trabayu resuelve nun plazu de 15 díes almitiendo o refugando'l zarru de la planta de Villamayor. Dicha resolución ye recurrible ante La Conseyería d'Industria.

Precisamente esti miércoles, en declaraciones a los periodistes, el voceru del Comité d'Empresa de la planta, Toni Sánchez, defendió que la fábrica asturiana ye "vidable" y "productiva". Esplicó que los trabayadores ficieron entrega a la compañía d'un plan social que la dirección de Chupa Chups consideró esaxeráu. Por eso, espera que na xunta la empresa presente otru plan "a la baxa". Les reivindicaciones de los trabayadores referíense a les indemnizaciones y al treslláu de tola plantiya y non sólo d'una parte al centru de producción catalán.

"Too esto ye duro", esplicó Toni Sánchez, que señaló sicasí que los trabayadores van siguir "lluchando" pola continuidá de la planta n'Asturies. Amás, dixo que cuenten col apoyu del Principáu d'Asturies.