Al Maliki: "Irak ye güei un país soberanu ya independiente"

BAGDAD 31 Ago. (Reuters/EP) -

El primer ministru iraquín, Nuri al Maliki, defendió esti martes qu'Irak ye yá un país independiente" cola salida de les tropes de combate d'Estaos Xuníos y aseguró que les sos fuerces de seguridá van faer frente agora a toles amenaces, tanto internes como esternes.

"Irak ye güei (un país) soberanu ya independiente", señaló Al Maliki nun discursu televisáu a la población con motivu del fin de la misión de combate estaunidense. "Les nueses fuerces de seguridá van asumir el lideralgu en afitar la seguridá y salvaguardar el país y en desaniciar toles amenaces que'l país tenga qu'encarar, seyan internes o esternes", añadió.

El día de güei marca'l final de les operaciones de combate de les fuerces estaunidenses espardíes n'Irak dende la invasión del país en marzu de 2003 y el númberu d'efectivos quedó amenorgáu a 50.000.

Agora los seis brigaes estaunidenses que queden van centrase n'entrenar y aconseyar a la Policía y l'Exércitu iraquín a midida que'l país asume la responsabilidá de la so seguridá de cara a la retirada total de les fuerces norteamericanes pa finales del viniente añu.

D'acordies con Al Maliki, "cola execución de la retirada de les tropes, les nueses rellaciones con Estaos Xuníos entraron nuna nueva fase ente dos países iguales y soberanos".

El presidente estaunidense, Barack Obama, prometiera a los sos votantes nes elecciones de payares de 2008 que sacaría a Estaos Xuníos de la guerra n'Irak. La fecha del 31 d'agostu constitúi una fecha más bien simbólica, yá que nel país asiáticu va permanecer un contingente considerable de 50.000 efectivos por otros 16 meses.