Mediu Rural va firmar un conveniu d'investigación del cultivu y la ellaboración del vinu de Cangas

   El conseyeru de Mediu Rural y Pesca, Aurelio Martín, anunció güei en Cangas de Narcea, la firma d'un conveniu ente'l Serviciu Rexonal d'investigación y Desarrollu Agroalimentariu (Serida), l'Asociación de Vinu de Calidá de Cangas y l'Asociación de Productores y Ellaboradores de Vinu de Cangas del Narcea, pal desarrollu d'un Plan d'Investigación y Desarrollu Tecnolóxicu Cel cultivu de la vid, y la ellaboración d'estos caldos.

   Esti plan tien por oxetu la esbilla clonal de les variedaes acoyíes a Vinos de Calidá de Cangas, y l'estudiu de les condicioens de cultivu de la vid más apropiaes (poda, marcu de plantación y portainxertos) y meyor adautaes a les característiques d'esti territoriu.

   El conveniu, que va firmase nes próximes selmanes, cuenta con una dotación económica de 329.565 euros y va tener una vixencia de trés años, según informó'l Gobiernu asturianu nuna nota prensa.

   Martín, que participó na presentación del Vinu de Calidá de Cangas, destacó demientres la so intervención el crecimientu tanto cualitativu como cuantitativu de los vinos de la comarca del Narcea, tal y como demuestren les cifres de producción.

   Nesti sen, recordó que l'añu 2002 la producción malpenes superaba los 42.000 llitros, -38.561 de tintu y 1.750 de blancu-, mientres que nel 2008, la cifra ascendió a 67.110 llitros de vinu -56.573 de tintu y 8.529 de blancu--, "lo que da una idea del grau de consolidación del sector".

   De la mesma manera, allabó la profesionalización y modernización que na última década realizaron los viticultores de la comarca y que permitió que güei estos caldos cuenten con una figura de proteición europea que reconoz la so calidá y-yos permita ser competitivos nel mercáu.

   "L'alta calidá d'esti vinu, que favoreció esta denominación, débese a que los viticultores continúen ellaborando güei los sos vinos d'acordies con práutiques tradicionales, pero aplicando procesos tecnolóxicos y enolóxicos modernos, orientaos a la meyora del productu final", confirmó'l conseyeru.