Méndez retruca a Zapatero que tres la güelga nun quier diálogu

MADRID, 1 de Setiembre (EUROPA PRESS)

El secretariu xeneral de la Unión Xeneral de Trabayadores (UXT), Cándido Méndez, alvirtió al presidente del Gobiernu, José Luis Rodríguez Zapatero, que tres la güelga xeneral convocada pal próximu 29 de setiembre, nun debe haber diálogu, sinón una "rectificación" de la política del Executivu pa combatir la crisis.

D'esta manera, el líder uxetista respondía a les palabres pronunciaes por Zapatero mientres la so visita a Xapón, nes que manifestó el so deséu de que tres el paru convocáu contra les últimes midíes adoptaes pol Gobiernu siga'l diálogu ente ambes partes.

Mientres la so intervención nuna Asamblea de Delegáu de la Federación de Servicios del sindicatu (FES-UGT) pa llamar a la güelga a los trabayadores del sector, Méndez consideró que la güelga xeneral va significar "una espresión bien dura y atayante del refugu a la política del Gobiernu", nun contestu nel que la valoración política de Zapatero esbarrumbóse y (Mariano) Rajoy nun sal del furacu".

El secretariu xeneral d'UXT esplicó que cola convocatoria del 29-S los sindicatos van defender lo qu'hai un añu y mediu defendíen toles instituciones: "acabar col imperiu de l'avaricia y regular los mercaos financieros que provocaron la hecatombe".

"El Gobiernu tornó nel campeón de les polítiques de dereches de los países europeos, del Bancu d'España y del Fondu Monetariu Internacional", señaló Méndez, que comparó a España con un "mediu muertu que soterraron pámpana abaxo y que cuanto más escava más se funde".

N'esti mesmu sen, alertó que'l "volantazu de sópitu" del Executivu va tener un efectu secundariu sobre la economía, y consideró qu'estos planteamientos "condenen el presente y el futuru" de la sociedá española", con un agravamientu de la situación social, y la precarización del empléu.

Méndez tamién atacó a los que pretenden "aprovechar una bona crisis" pa degradar el papel del estáu del bienestar, avanzar na privatización de servicios básicos, recortar el papel de la negociación colectiva y precarizar l'empléu. "Decidieron retorce-y el pescuezu a la pita en cuenta de quitar les plumes una a una, pero nun lu van a algamar", sentenció.

Amás del líder d'UXT, el secretariu xeneral de FES-UGT, José María Villa y el secretariu xeneral d'UXT-Madrid, José Ricardo Martínez, afalaron al auditoriu a secundar la güelga xeneral.

Villa, nuna intervención vehemente, llamó a los compañeros de sindicatos a "tar nos piquetes el día 29", y punxo como exemplu la reacción de los trabayadores del Metru de Madrid, tres la implantación de "unos servicios mínimos illegales".

Pela so parte, Martínez previó un siguimientu "masivu", tanto en Madrid como nel conxuntu del Estáu, y recordó al Gobiernu que'l so principal apoyu ye la clase trabayadora. "Púnxose en frente del que lu upó y lu caltuvo nel Gobiernu", acusó.