El númberu d'autónomos afiliaos cayó en más de 14.000 trabayadores

EP

MADRID 30 Ago. (EUROPA PRESS) -

El númberu d'afiliaos al Réxime Especial de Trabayadores Autónomos (RETA) baxó nel primer semestre de 2010 en 14.045 trabayadores, informó l'Asociación de Trabayadores Autónomos (ATA).

Según la organización, les altes de los autónomos xubieron un 11,4% en tasa interanual, lo que supón un total de 236.186 emprendedores. Pel so llau, el númberu de baxes representa una baxada interanual del 13,6% con 277.082 baxes.

Les úniques comunidaes autónomes nes que'l númberu d'altes nel primer semestre del añu foi superior al de baxes fueron Isles Baleares, con un total de 5.153 cotizantes más al RETA, y Ceuta y Melilla, con una pequeña medría de 4 y 26 autónomos, respectivamente.

Por provincies, hai destacar que nada más que la provincia de Xaén zarró'l primer semestre del añu con una medría nel númberu de baxes, concretamente 46 baxes más que nos seis primeros meses de 2009. Nel otru estremu tán les provincies que meyor comportamientu interanual rexistraron, con una baxada nel númberu de baxes, Guadalaxara (-29,7%), Segovia (-22,5%), Castellón (-26,2%), Cádiz (-21,8%) y Toledo (-21,6%).

"Hai que poner tol esfuerzu posible p'algamar que'l trabayu autónomu seya una alternativa eficaz pa facer frente al desempléu. España necesita emprendedores, pero pa ello hai que fomentar, facer atractivu l'autoempleu y algamar que ser autónomo seya más cenciello y más seguro", apuntó'l presidente d'ATA, Lorenzo Amor.

Les baxes nel RETA puen ser a consecuencia de dellos factores como'l parón d'actividá, la xubilación, incapacidá o cambiu d'actividá. Esti comportamientu rexístrase en toles comunidaes autónomes, incluyendo les ciudaes autónomes de Ceuta y Melilla.