Obama anuncia'l fin de les operaciones n'Irak

NUEVA YORK, 01 de Setiembre (EUROPA PRESS)

El presidente de Estados Uníos, Barack Obama, anunció oficialmente esti martes el fin de la misión de combate del Exércitu norteamericanu n'Irak tres más de siete años y señaló que ye momentu de "pasar páxina" y centrase nel llabor d'impulsar la economía estaounidense.

"La operación 'Llibertá iraquina' acabó. El pueblu iraquín tien qu'asumir agora la seguridá del so país", indicó'l mandatariu norteamericanu nel so segundu discursu a la nación pronunciáu en directo dende'l Despachu Oval de la Casa Blanca.

El presidente estadounidense recordó que'l pasáu mes de febreru, cumpliendo con una de les sos promeses electorales, anunció'l repliegue de toles tropes dedicaes a los llabores de combate pal 31 d'agostu. D'equí p'arriba, 50.000 soldaos norteamericanos van permanecer en Irak cumpliendo puramente llabores d'adiestramientu y asesoramientu pa les fuerces armaes iraquines.

"Con esto queda completada la transición a los iraquinos de la responsabilidá de la so propia seguridá", apuntó Obama, añadiendo qu'a pesar del trespasu de poderes a les fuerces de seguridá iraquines el compromisu" d'Estaos Uníos con Irak nun acabó.

Mientres el so discursu, Obama rindió tributu a los cerca de 4.400 soldaos que dieron "les sos vides n'Irak" y tamién tuvo palabres pa los partíos políticos iraquinos, que cinco meses dempués de les elecciones parlamentaries celebraes en marzu nun algamaron un acuerdu pa la formación d'un Gobiernu de coalición.

"Animo a los líderes iraquinos a qu'avancen con sentíu d'urxencia pa formar un gobiernu incluyente", indicó Obama, qu'aseguró que'l pueblu de Irak va tener n'Estaos Uníos "un sociu estable" una vez que la clase política del país árabe algame un acuerdu de Gobiernu.

"PASAR PÁXINA" Y CENTRASE NA ECONOMÍA

El presidente d'Estaos Uníos reconoció que'l "momentu históricu" del fin de les operaciones de combate n'Irak produzse en "una época de grandes rocees pa munchos estadounidenses". "Agora ye momentu de pasar páxina", indicó.

"Güei'l nuesu llabor más urxente tien de ser el de reestablecer la nuesa economía y poner de vuelta al trabayu a los millones d'estadounidenses que perdieron el so empléu", afirmó'l presidente norteamericanu, que volvió apostar pol desarrollu de nueves industries que permitan crear empleos y "acabar" cola dependencia estadounidense del petroleu.

"Desafortunadamente, mientres la última década, nun ficimos lo necesario pa finxar los cimientos de nuesa mesma prosperidá. Gastemos cerca d'un billón de dólares en guerres", llamentó.

LA LLUCHA CONTRA AL QAEDA YE "IMPRESCINDIBLE"

A pesar de la marcha de les tropes de combate estadounidenses d'Irak, Obama destacó que'l so Gobiernu va siguir lluchando pa confrontar el terrorismu y defendió los sos planes pa la misión d'Afganistán. "Nun hai un retu más imprescindible pa la nuesa seguridá que la llucha contra Al Qaeda", afirmó'l mandatariu.

"Mientres pronuncio estes palabres, Al Qaeda sigue conspirando contra nós y los sos líderes caltiénense fondiaos nes rexones fronterices d'Afganistán y Pakistán. Vamos esbaratar, vamos desmantelar y vamos ganar a Al Qaeda, al tiempu qu'evitamos qu'Afganistán torne nuna base pa los terroristes".

Coles mesmes, el mandatariu indicó que gracies a la salida d'Irak va haber más recursos p'aumentar el potencial de les fuerces de seguridá d'Afganistán, país nel que se rexistró un importante repique de les víctimes militar y civil mientres los últimos meses.

"Como asocede n'Irak, nun podemos facer polos afganos lo qu'ellos tienen que facer n'última instancia. Por eso ye polo que tamos adiestrando a les Fuerces de Seguridá d'Afganistán y apoyando la resolución política de los problemes afganos", repostió.