Una ofensiva aérea d'Islamabad mata a más de 60 persones ente milicianos y civiles

Reuters

PESHAWAR (PAKISTÁN), 1 de Setiembre (Reuters/EP)

Un total de 62 persones, ente elles unos 40 milicianos, familiares d'estos y civiles morrieron abatíes n'ataques aéreos de les fuerces gubernamentales nel noroeste de Pakistán, según informaron esti miércoles funcionarios paquistaninos.

La pasada nueche rexistráronse trés ataques aéreos contra ún de los feudos de los talibán paquistaninos, el valle de Tirah, na rexón de Jiber, al par de la frontera afgana. "Tenemos información sobre qu'ente 40 y 50 terroristes morrieron", dixo un funcionariu de seguridá a Reuters.

Otros 17 milicianos resultaron abatíos esti miércolos n'otros ataques aéreos con helicópteros armaos contra la rexón de Kurram, próxima a Jiber, nos que tamién se destrueron trés escondites de la insurxencia, según funcionarios d'Intelixencia.

Les cifres nun les confirmaron fontes independientes y la insurxencia desmiente dafechu los balances gubernamentales.

Les fuerces paquistanines aumentaron nos últimos meses los ataques aéreos contra Jiber y les zones tribales axacentes, d'etnia pashtún, dirixíos contra insurxentes que l'añu pasáu fuxeron de los bastiones talibán de Swat y Waziristán del Sur, al par de la frontera afgana. Estos ataques podríen socavar los esfuerzos pa ganar la guerra contra los talibán ente la población civil.

"Delles families vivíen nes cercaníes d'estos escondites y éstes alcuéntrense tamién ente los muertos", dixo'l funcionariu de seguridá sobre los ataques en Jiber.

Un altu funcionariu del gobiernu en Jiber, Rehan Khattak, indicó que seis civiles, ente los qu'había muyeres y neños, los cuales nun teníen nada que ver colos insurxentes, morrieron nún de los ataques. "Otres cuatro persones resultaron firíes", añadió.

El pasáu abril, 50 miembros d'una mesma tribu morrieron nun ataque aereu en Tirah, tres confundilos con un grupu de talibán, lo qu'obligó al xefe del Exércitu paquistanín, el xeneral Ashfaq Kayani, a ofrecer una disculpa.