La oficialidá del asturianu queda descartada, al dexar claro'l PP que "de nenguna manera" va asumir la propuesta del CAO

UVIÉU, 08 de xunetu (EUROPA PRESS)

El Partíu Popular nun va asumir "de nenguna manera" la propuesta d'oficialidá de la llingua asturiana que güei presentó'l Conceyu Abiertu pola Oficialidá (CAO) a los Grupos parlamentarios de la Xunta Xeneral del Principáu.

Asina de claro mostróse güei'l parlamentariu popular, y miembru de la mesa qu'ellabora la ponencia estatutaria Joaquín Aréstegui, en declaraciones a Europa Press, tres recibir a los miembros del CAO. Esta confirmación descarta cualquier posibilidá de que la llingua asturiana seya oficializada na presente reforma del Estatutu, pues el Partíu Socialista ya mostró la so oposición a la midida, siendo Izquierda Xunida-Bloque por Asturies-Verdes, formación que sólo cuenta con cuatro diputaos, la única que va defender la propuesta del Conceyu.

Xulio Casado y Fernando Ornosa, en representación d'esti colectivu, visitaron güei a los tres grupos pa dexa-yos la propuesta d'artículu cuartu del Estatutu d'Autonomía qu'ayeri ficieron pública nun actu ante la Xunta.

Na mesma recuéyese lo siguiente: "les llingües cooficiales del Principáu d'Asturies son el castellanu y l'asturianu. El gallego-asturianu, tamién ye llingua oficial nel so ámbitu territorial. Tolos ciudadanos tienen derechu a conoceles y usales. Naide va poder ser discrimináu pola mor de la llingua que llibremente escueya y utilice. Les Alministraciones públiques han garantizar l'usu normal d'estes llingües, amás de la so promoción, enseñanza y presencia amañosa nos medios de comunicación. Una llei de la Xunta Xeneral del Principáu tien de determinar los criterios del procesu de normalización llingüística".

Aréstegui comprometióse a facer entrega de la mesma al presidente popular, Ovidio Sánchez, y al restu de miembros populares de la ponencia, y atendió al pidimientu de los miembros del CAO d'acordar un conceyu ente dambes partes. Sicasí, dexó claro que "nós nun somos partidarios de la cooficialidá, nin de la oficialidá del asturianu, y poro esi testu nun lu vamos asumir de nenguna manera".

Matizó sin embargu que, llegáu'l momentu, el so grupu va facer delles propuestes en favor de la normalización del asturianu. "Tamos dando vueltes al tema p'avanzar en dalgunos aspeutos", d'ente los cuales calcó nel plan de normalización aprobáu na Xunta.

Pela so parte, Izquierda Xunida-Bloque por Asturies-Verdes, como organización integrante del CAO, comprometióse a defender esi testu nos conceyos correspondientes de la Ponencia, mientres que'l PSOE nin siquier recibió a los representantes del Conceyu. "Niéguense a recibimos y tovía nun algamamos contactar con ellos", esplicó Ornosa. De toes maneres, los socialistes ya dexaron claro que tampoco van asumir el testu.

El tema probablemente se trate nos conceyos del mes de setiembre, según les previsiones de los tres grupos.

OFICIALIDÁ DESCARTADA.

Cola confirmación de la negativa del PP a aceptar la propuesta del CAO, queda descartada dafechu la declaración d'oficialidá de la llingua asturiana na nueva reforma del Estatutu d'Autonomía.

L'asunción per parte de los populares de la propuesta yera la única baza cola que contaben los partidarios de la oficialidá, postura que pel momentu sólo apoya IX-BA-Verdes. Los integrantes del CAO, movimientu qu'axunta a más de 250 organizaciones en favor de la reconocencia oficial de la llingua, xustificaben el so enfotu nos populares, basándose nes actitudes y delcaraciones de determinaos cargos públcios del partíu en favor de la normalización y proteición de la llingua.

Ente elles, la más significativa foi la postura que l'alcalde d'Uviéu, Gabino de Lorenzo, adoptó sobre esti tema, reivindicando la necesidá de defensa de la llingua asturiana. Esta toma d'actitú, pródúxose paralelamente a la inclusión na última llista electoral llocal del actual conceyal de Cultura del Conceyu uvieín, José Suárez Arias-Cachero, conocíu pola so anterior militancia nel nacionalismu asturianu.

Sicasí, los pronunciamientos del PP nunca pasaron de ser una demanda de mayor proteición de la llingua, ensin llegar en nengún momentu asumir la oficialidá, aspeuto que siempre descartó Joaquín Aréstegui, voceru del partíu nesti asuntu.