UVIÉU, 05 de Marzu (EUROPA PRESS)
Izquierda Xunida, Bloque por Asturies, Asociación de Trabayadores de la Normalización Llingüística y la Xunta pola Defensa de la Llingua Asturiana salieron güei a la defensa de la decisión del Ayuntamientu de Cangas del Narcea de valorar como méritu los conocimientos d'asturianu, y dexaron claro qu'esta midida nun tien nada de discriminatoria.
Estos colectivos quisieron responder asina a les declaraciones de la conseyera d'Alministraciones Públiques, Ana Rosa Migoya, que dicía que la midida nun ye llegal, porque la Llei de Promoción y Usu sólo reconoz la valoración d'esti méritu pa oposiciones en puestos que tengan que ver directamente cola llingua asturiana. Ye la interpretación que fai la responsable autonómica del artículu cuartu d'esta norma, qu'únicamente fala de puestos de trabayu con característiques "que lo requieran", sin más especificación. Tamién CC.OO y UXT mostraron la so oposición a la propuesta, incluyida nel nuevu Plan de Normalización.
Nesti sen, Izquierda Xunida emitió güei un comunicáu nel que recuerda que la llei "ampara el derechu de los ciudadanos a conocer y usar l'asturianu y establecer los medios que lo faigan efectivu y asegurar el so llibre usu y la non discriminación de los ciudadanos". Amás, matiza que, nel casu de los ayuntamientos, señala que "podrán adoptar les midíes necesaries p'asegurar la efeutividá del exerciciu de los derechos llingüísticos qu'esta llei otorga". Pa la coalición, nun hai poro nenguna torga llegal frente a la decisión del Conceyu cangués.
Otru partíu, Bloque por Asturies, coaligáu con IU, aplaudió la propuesta de Cangas porque "ye un signu de valentíu, sen común y xusticia democrática". Refugó les crítiques de Migoya, a la que tachó de "madre superiora, sobre tolo que güel a llibertaes y derechos llingüísticos". Según el voceru de BA, Pablo González, ye un signu del so "autoritarismu provincianu y paletu". Criticó tamién a los sindicatos CC.OO y UXT, de los que recordó que formen parte del Conceyu Abiertu pola Oficialidá, y recomendó-yos "velar pola llimpieza y xusticia nes pruebes de selección d'emplegu públicu, que suelen tar manchaes por clientelismu políticu y sindical".
La Xunta pola Defensa de la Llingua tampoco dexó pasar la oportunidá pa felicitar al Ayuntamientu de Cangas. El so voceru, Xulio Viejo, felicitó al Conceyu por "valorar l'asturianu como cualquier otru conocimientu". "Les afirmaciones a la escontra", señaló refiriéndose a Migoya y a los sindicatos, "evidencien el despreciu pola llingua y la despreocupación nesti sen". Recordó que nes oposiciones en cuestión valoraráse l'asturianu "como ún méritu más, y non como una condición obligatoria", negando asina que seya "discriminatorio". "En toles oposiciones se valoren méritos de tou tipu", añadió. Recordó tamién a la conseyera que cuando la Llei d'Usu fala de puestos que trabayu que lo requieran, refierse a puestos d'atención al públicu o asemeyaos, y non esclusivamente a los que tengan que ver cola llingua asturiana.
A lo último, l'Asociación de Trabayadores de Normalización publicó güei tamién un comunicáu nel que descartó que la midida de Cangas seya "discriminatoria". "Nun ye una valoración escluyente del asturianu, sinón incluyente y complementaria", afirmó'l testu pa dexar claro que "el conocimientu y la valoración de la formación nun fai sinón meyorar la competencia, la profesionalidá y el bon facer de cualquier profesional públicu o priváu".
"La única discriminación", añadió'l colectivu, "protagonícenla les alministraciones que, como venimos viendo, pretenden manipular, torgar y arrequexar l'usu del asturianu y el gallego-asturianu, mediante la demagoxa y l'olvidu continuu de lo que dicten les lleis, que, d'otramiente, ellos mesmos dictaron".