Rajoy calca en que Camps "tien que ser" el candidatu na Comunidá Valenciana y evita falar de Cascos

MADRID/UVIÉU, 2 de Setiembre (EUROPA PRESS)

El presidente del PP, Mariano Rajoy, calcó esti xueves en que'l presidente de la Comunidá Valenciana, Francisco Camps, "tien que ser" nuevamente'l candidatu del partíu nes elecciones autonómiques de mayu del añu qu'entra. Sicasí, nun se quiso pronunciar sobre una posible candidatura del ex vicepresidente del Gobiernu Francisco Álvarez Cascos n'Asturies.

En rueda prensa en Toledo tres la xunta estraordinaria del Comité de Dirección del PP, Rajoy señaló que'l partíu va nomar a los candidatos a los comicios autonómicos "cuando toque", pero quiso dexar claro que Camps "tien que ser el candidatu del PP a les próximes elecciones" na Comunidá Valenciana.

A la entruga de si'l presidente valencianu va ser el candidatu del PP digan lo que digan los tribunales sobre la so imputación nel 'casu Gürtel', Rajoy llendóse a responder que yá dixo "tolo que tenía que dicir sobre esti asuntu".

En relación a les informaciones publicaes sobre una posible financiación illegal del PP valencianu, Rajoy remitióse al comunicáu qu'emitió esti miércoles el partíu na rexón nel qu'aseguraba que la so financiación "ye absolutamente llegal" y que "se fiscalizó convenientemente cada añu nos órganos competentes".

Sobre la posibilidá d'una candidatura d'Álvarez Cascos pa la Presidencia del Principáu d'Asturies, el líder del PP esplicó que na xunta de Toledo del Comité de Dirección "nun se pronunció una palabra" sobre les candidatures a les elecciones del añu qu'entra.

Con éses, el presidente de los 'populares' calcó en que'l partíu va nomar a los candidatos "cuando toque con arreglu a les regles internes del partíu".