Los sindicatos d'enseñanza llamen a la sociedá a movilizase pola especialidá d'asturianu y la mención en Maxisteriu

UVIÉU, 05 de Marzu (EUROPA PRESS)

Los sindicatos d'enseñanza Suatea, Comisiones Obreres, UXT y USO ficieron güei un llamáu a la sociedá pa movilizase'l próximu sábadu pola creación de la especialidá docente de llingua asturiana y l'aprobación d'una mención (especialidá universitaria) d'esta materia na reforma de los planes d'estudiu de Maxisteriu.

Les cuatro centrales sindicales dieron güei una rueda de prensa, convocada pola Xunta pola Defensa de la Llingua, p'apoyar la manifestación que pal próximu sábadu esta organización tien convocada n'Uviéu por estes reivindicaciones. La cita ye a les 17.00 hores na estación de Renfe d'Uviéu.

Tres exixir una vez más, dende la Xunta, y esta vez en boca de Paula Cristóbal, la creación de la especialidá y la mención, y la dimisión de la directora la Maxisteriu, Gloria López Téllez, por nun atender a esta demanda na propuesta de menciones cualifidaores pa Maxisteriu, tomó la pallabra Primi Abella, en representación de Comisiones. Recordó que la demanda d'asturianu n'educación primaria y secundaria aumenta tolos años, pero que la situación del profesoráu ye precaria. Asina, refirióse a la falta d'especialidá, que nesti momentu indica que "nun se sabe cómo se va contratar a esti profesoráu nel futuru", dempués de que desapaeza'l personal funcional, que ye'l colectivu nel que taba incluyíu.

Pela so parte, Maite Duarte, de Suatea, denunció públicamente la situación de la llingua, "que cada añu tien más escolinos, pero empeora". Amás de señalar que los profesores d'asturianu nun tienen oposiciones, recordó l'altu porcentaxe d'interinos itinerantes d'esti sector, y de medies xornaes, con horarios apretaos y altu númberu d'alumnos. Amás, recordó la falta d'ufierta en munchos institutos de l'asignatura, y la exixencia de ratios mínimos pa la formación de grupos, dalgo que nun s'exixe a otres materies.

Tomó la pallabra tamién la representante d'UXT, María José Secades, que criticó duramente la non creación de la mención en Maxisteriu. "N'Asturies más la metá d'escolinos de primaria cursen llingua asturiana", afirmó, pa entrugar de siguío "¿quién va formar a estos profesores si nun ye la Escuela de Maxisteriu?". Per otra parte, consideró necesaria la creación de la especialidá d'asturianu, enantes de la creación de cualquier plantiya. "Ye'l primer pasu pa la llegalización d'esta situación", afirmó. Dende'l so puntu de vista, si se crea la especialidá, tendrá que crease la mención.

Na rueda prensa, tuvo tamién presente Pilar Margolles, d'USO, que nun tomó la pallabra.

Los representantes sindicales, en pallabres de Secades, animaron al sector de la enseñanza, y a la sociedá en xeneral, a movilizase en favor de estes reivindaciones "dando'l primer pasu esti sábadu diendo a la manifestación". Amás, Abella, dixo que la próxima movilización tien de ser "de tolos profesores d'asturianu".