Suatea acusa a Educación d'obligar a estudiar la optativa de francés a un alumnu qu'escoyera la d'asturianu

   El Sindicatu Autónomu de Trabayadores de la Enseñanza d'Asturies (Suatea) acusó güei, nuna nota prensa, a la Conseyería d'Educación de "tratu discriminatoriu" contra un alumnu de segundu d'ESO de Xixón qu'escoyera la optativa d'asturianu, como llevaba faciendo en tola so etapa educativa, y al que, sin previu avisu nin comunicación, incluyóselu na clase de francés.

   Según esplicó'l sindicatu, "dempués de recibir clase d'Asturianu en tola etapa Primaria y siguir en primeru la ESO, nel segundu cursu esviáronlu pa la optativa de Francés ensin tenela cursao en primeru, ensin tenela escoyío y, lo que ye más grave, ensin autorización de los pas". "Tórgase-y automáticamente la so escolarizacíon n'Asturianu por ser la única persona de segundu que la escoyó como optativa", esplicó la nota. Amás, denunció que'l trámite fízose "ensin mediar comunicación col alumnu nin la familia".

   Suate reconoz que la resolución 16 de mayu de 2008 de la Conseyería d'Educación, pola que s'establez la ufierta y les condiciones pa la elección de materies optatives y materies opcionales pa la Educación Secundaria Obligatoria, fala d'un mínimu d'ocho alumnos pa formar un grupu d'una optativa", pero recuerda que "prevé qu'escepcionalmente se formen grupos con menos alumnos".

   Suatea exixó qu'anque seya 'escepcionalmente' pa la Conseyería, "se respeten los derechos del alumnáu asturianu, s'acabe cola situación d'escepcionalidá de la enseñanza de la nuesa llingua y se dicten normes y reglamentos acordies coles lleis vixentes".