UVIÉU, 26 de Marzu (EUROPA PRESS)
El secretariu de la Federación de Tresportes d'UXT, Florentino Vázquez, acusó güei a la patronal del tresporte Asetra de querer "cargase'l conveniu que ta firmáu". Vázquez indicó amás que ye un altu númberu de trabayadores el que ta secundando la segunda xornada de fuelga nel sector y afirmó que los vehículos de mercancíes que circulen son los de los tresportistes autónomos, a los que pidió "solidaridá".
En declaraciones a Europa Press, Vázquez afirmó que dambes partes tuvieron ayeri a punto de llograr un acuerdu pero una vez más "Asetra lu dinamitó porque nun quiso presentase y per teléfonu mos dicen que nun quieren mediación nin nada".
"Ellos lo que quieren ye romper claramente'l conveniu asina que los trabayadores dedicimos siguir cola fuelga porque nun mos queda otra salida", esplicó'l representante sindical.
Sobre'l siguimientu de la fuelga nesta segunda xornada indicó que los tresportes de viaxeros tán siguiendo la fuelga de manera "mayoritaria". Sobre los de mercancíes manifestó que los que circulen y tán trabayando son los autónomos, que son la mayor parte --3.800 frente a 1.500 asaliariaos--.
Nesti sen, indicó que los sindicatos tán siendo mui prudentes y respeten a los que trabayen porque UXT lo último que busca ye la confrontación ente trabayadores. "La fuelga ta convocada porque nun queremos permitir que mos quiten el conveniu", dixo Vázquez.
"DAÑOS Y AMENACES"
Pela so parte, les patronales del tresporte de viaxeros, CAR, Astra y Asvipymet denunciaron güei los "numberosos daños materiales en vehículos y hasta les llamaes personales amenazantes" que se tán rexistrando nesta segunda xornada de fuelga del tresporte que caltién "práuticamente paralizáu'l sector de viaxeros".
Según indicó a Europa Press la vocera d'Astra, Maite Casal, si ayeri yá se rexistraron estrozos güei s'intensificaron. Dende rotura de llunes y pinchazos nes ruedes hasta llamaes personales amenazantes. Agora les tres patronales van caltener un conceyu p'atropar tolos datos y evaluar los daños.
Sobre'l cumplimientu de los servicios mínimos, tampoco güei se pudieron cumplir na so totalidá. Polo menos asina lo destacaron dende la patronal, que volvió solicitar la intervención de la Delegación de Gobiernu.
Pela so parte, la patronal del tresporte de mercancíes, Asetra, calcó nel "fracasu" del paru nel so sector, y aseguró que güei circulen hasta más vehículos de los que lo facíen ayeri.
