La Xunta pola Llingua faise ecu d'un nuevu pidimientu del Conseyu d'Europa pa que s'oficialice l'asturianu

UVIÉU, 11 de Payares (EUROPA PRESS)

La Xunta pola Defensa de la Llingua Asturiana fízose ecu güei d'un pidimientu del representante del Secretariáu de la Carta Europa de les Llingües Minoritaries del Conseyu d'Europa, Alexei Kozhemyakov, de la declaración oficialidá del asturianu.

Nuna rueda prensa, el representante de la Xunta, Carlos Pulgar, informó d'esti pidimientu, espresáu pol cargu del organismu internacional demientres una entrevista que caltuvieron el pasáu sábadu, 31 d'ochobre na población de Ljouwert (Frisia-Holanda). Miembros de la organización asturiana treslladáronse a esta rexón europea esi fin de selmana, con motivu de la celebración del Festival Liet 09 de música en llingües minoritaries europees.

Nuna grabación, Pulgar ofreció una audición de les palabres testuales de Kozhemyakov, qu'espresó la "recomendación inequívoca del Comité de Ministros, del Comité d'Espertos y del Conseyu d'Euroopa de la declaración del asturianu como llingua oficial".

Según el miembru de la Xunta, el representante del Conseyu espresóse nesti sen dempués de que la organización asturiana tresmitiéra-y la so preocupación sobre la situación de la llingua no referente a la falta d'oficalidá. Según la Xunta, "Kozhemyakov demostró'l so conocimientu y preocupación pola situación d'esti idioma, faciendo una esposición de les aiciones y actividaes que va desarrollar el Conseyu pa favorecer elcumplimientu de la Carta polos estaos firmantes", 23 en total, ente ellos España.

Una de les recomendaciones del documentu ye precisamente la declaración d'oficialidá. Asina, Pulgar matizó que dichos encamientos "son vinculantes", pero impliquen al Estáu en cuestión, polo que lo que'l Conseyu d'Europa pue facer ye insistir nel so cumplimientu.

Nesti sen, Pulgar aseguró que Kozhemyakov comentó-yos que nel Conseyu "resulta inesplicable que n'España haya unos territorios onde diches recomendaciones se cumplen y otros onde non", en comparanza de les comunidaes que tienen llingua propia oficializada cola situación d'Asturies.

Poro, la Xunta reclamó a les instituciones del Estáu Español "que faigan el so trabayu pa esi cumplimientu".

Amás, señaló que quedaron "los canales de comunicaciones abiertos con esti secretariáu de la Carta Europea de les Llingües Minoritaries", y adelantó que la Xunta entamará nueves iniciatives por esti tema.