La Xunta pola Llingua pide la dimisión de la directora de Política Llingüística por "mentir" al Conseyu d'Europa

UVIÉU, 12 de Febreru (EUROPA PRESS)

La Xunta pola Defensa de la Llingua Asturiana exixó güei la dimisión de la directora xeneral de Política Llingüística, Consuelo Vega, por "mentir y tapecer información" al Conseyu d'Europa, en referencia a les consultes que se-y plantegaron al Principáu dende esti organismu sobre la situación del asturianu y la so falta d'oficialidá. Según la entidá comunitaria, la respuesta del Principáu foi la falta d'una llingua normalizada y d'una lliteratura desarrollada.

Asina lo espresó güei Lucía Menéndez, en representación de la Llingua, nuna rueda prensa pa presentar la nueva campaña de collaboración ente esti colectivu y l'Aconceyamientu de Xuristes pol Asturianu (AXA), pa tratar d'ayudar al Gobiernu español a estudiar un marcu mayor proteición del asturianu. Nel actu tamién tuvieron presentes, Paula Cristóbal, pola Xunta, y Xurde Blanco y Xose María Estrada pol AXA.

En llectura d'un comunicáu, Lucía Menéndez dixo que la Xunta pola Defensa de la Llingua Asturiana "nun pue dexar de pidir la dimisión inmediata de la Directora Xeneral de Política Llingüística Consuelo Vega, -por mentir y ocultar información sobre les consultes que l'Estáu Español, a iniciativa del Conseyu d'Europa, dirixó al Gobiernu Asturianu pa la ellaboración del últimu informe sobre'l siguimientu n'Asturies de la Carta Europea de les Llingües Minoritaries- y desixir responsabilidaes polítiques d'estos fechos tanto a los cargos políticos, conseyera y viceconseyeru, de los que depende la dirección Xeneral de Política Llingüística como a los partíos del gobiernu firmantes del pautu nel que s'enmarca y que permite la política llingüística nefasta que carecemos".

Asina, tanto la Xunta como AXA pidieron a los parlamentos español y asturianu l'esclariamientu de los fechos y la depuración de responsabilidaes pola "intolerable desvergoña institucional de mentir ante'l Conseyu d'Europa pa xustificar el tratu discriminatoriu que sufre la llingua y los sos falantes".

Nesti sen, Xurde Blanco esplicó que la socesión de los fechos que dieron nes supuestes mentires y tapadures d'información. El Conseyu d'Europa ye una organización europea que tien como oxetivu fundamental la proteición de los Derechos fundamental de los países que lu formen (47) y que tien aprobáu'l Conveniu pa la Proteición de los Derechos Humanos y Llibertaes Fundamentales, que reconoz "el derechu a poder espresase en llingua propia pública y privadamente", esplicó. "Pa desarrollar esti derechu", añadió, "aprobóse una llei especial, que ye la Carta Europea de Les Llingües Rexonales o Minoritaries, que n'España nun se ta cumpliendo no que cinca a la llingua asturiana".

Blanco recordó "la visita que fizo a Asturies un grupu d'espertos d'esti Conseyu d'Europa", na que se "sacó en conclusión que nun se taba cumpliendo la carta y que se taba mintiendo al Conseyu dando razones que nun son verdá pa xustificar que nun se cumpliere". Lo que vien a dicir a grandes rasgos el comité d'espertos ye, según el xurista, que "les autoridades señalen qu'hai una falta de normalización y d'una lliteratura escrita afayadiza, como razón pa que nun fuere oficial, pero demientres la visita nel terrenu, informóse al Comité d'Esperos de que l'Academia de la LLingua Asturiana tenía acabada la versión normalizada de la llingua (diccionariu, gramática y nomenclatura de topónimos), amás de qu'hai un 60% de la población a favor de la oficialidá, y que facía falta mayor presencia nos medios de comunicación y que tuviere disponible en tolos niveles d'Enseñanza".

"En consecuencia recomienda que se modifique'l nivel de proteición que nesti momentu tien la llingua nel Estatutu d'Autonomía", añadió. Según Blanco, esti informe pasó al Gobiernu Español, y d'ésti al asturianu, que tuvo "casi ocho meses pa facer les alegaciones correspondientes, pero dixo que nun alcontraben l'escritu nel que se-yos pidía la opinión, cuando nós lu algamamos pidiéndo-ylu al Ministeriu d'Alministraciones Públiques".

"Nun dicen nada nin contesten, y esti informe pasa al Comité de Ministros d'Asuntos Esteriores del Conseyu d'Europa, presidíu por Moratinos, y apruébase otru informe nel que se diz que les autoridaes españoles tienen qu'esaminar, en collaboración colos falantes d'asturianu, la posibilidá de meyorar el raseru de proteición del Estatutu", acabó Xurde Blanco.

CAMPAÑA DE COLLABORACIÓN

Pa poner en marcha esta collaboración como falantes, l'AXA y la Xunta anunciaron güei esti acuerdu. El mesmu va tener dos oxetivos fundamentales. En primer llugar la organización d'un "gran conceyu de falantes d'asturianu" dende'l qu'ofrecer al Gobiernu d'España la collaboración pidida pol Conseyu d'Europa pa estudiar les posibilidades de meyorar el nivel de proteición de la llingua nel estutu.

En segundu llugar, van firmar un conveniu de collaboración pa "facer un siguimientu de los incumplimientos n'Asturies de la Carta Europea de Llingües, y coordinar les denuncies al respeuto ante'l Conseyu d'Europa".