Xuristes pol Asturianu diz que la Llei d'Usu contempla la valoración de la conocencia d'asturianu nuna oposición

UVIÉU, 03 de Marzu (EUROPA PRESS)

L'Asociación de Xuristes pol Asturianu apoyó güei la midida anunciada pol Ayuntamientu de Cangas del Narcea de valorar la conocencia de la llingua asturiana nes oposiciones municipales y quiso dexar claro que ye "llegal dafechu", anque l'asturianu nun seya oficial, motivu argumentáu polos conceyales del Partíu Socialista del llugar pa votar a la escontra d'esta midida.

El colectivu recordó l'artículu cuartu de la Llei de Promoción y Usu del Asturianu. Nún de los sos puntos diz: "El Principáu d'Asturies va propiciar el conocimientu del bable/asturianu por tolos emplegaos públicos que desarrollen el so llabor n'Asturies; el conocimientu del bable/asturianu va poder ser valoráu nes oposiciones y concursos convocaos pol Principáu d'Asturies, cuando les característiques del puestu de trabayu y la naturaleza de les funciones que vayan a desarrollase lo requieran". Pal presidente de l'asociación, Xurde Blanco, si'l Principáu pue facer la valoración nuna oposición, nun entiende por qué nun va poder facer lo propio un Ayuntamientu.

Blanco calcó en que se suel confundir oficialidá con proteición, "y nun ye lo mesmo". Dende'l so puntu de vista, lo que ta faciendo l'Ayuntamientu de Cangas ye "reconocer el derechu de los ciudadanos a recibir tratu nel Ayuntamientu n'asturianu y a poder dirixise a l'Alministración llocal en llingua asturiana", dalgo que, recordó, ta recoyíu como derechu nel mesmu artículu cuartu de la Llei de Promoción y Usu.

Nun ye la única norma llegal a la que se refirió Blanco. L'artículu 10.4.b de la Carta de les Llingües Rexonales y Minoritaries, aprobada pol Conseyu d'Europa, y roblada pol Gobiernu español, contempla'l reclutamientu de funcionarios que conozan la llingua propia del territoriu de l'Alministración pa la que van trabayar.

Sicasí, Blanco dexó claro que valorar la conocencia d'una llingua nuna oposición ye dalgo llegal dafechu. "¿Y si piden inglés?", entrugó. "¿O si nun pueblu nel qu'hai un altu porcentaxe d'inmigrantes chinos, l'Ayuntamientu valora la conocencia del mandarín nes oposiciones pa puestos nos que tea xustificao?", añadió, pa de siguío recordar que'l casu de Cangas, al so xuiciu, ta más xustificáu que nestos últimos por tratase d'una llingua propia.

Refugó poro la oposición a la midida por que l'asturianu nun seya llegal y dixo qu'esti tipu d'opiniones "nun tienen xacíu, nun siendo que se piense que les llingües que nun son oficiales nun tienen derechu a existir".