Bi gizon atxilotu dituzte Gasteizen bi saltokitan lapurtzeagatik

   Ertzaintzaren agenteek 36 eta 31 urteko bi gizonezko atxilotu zituzten atzo Gasteizen, hiriko bi saltokitan lapurreta egin izana egotzita, Eusko Jaurlaritzako Herrizaingo Sailak gaur jakinarazi duenez.

   Atzo eguerdiko 12:00ak aldera, Ertzaintzak jakin zuen lapurreta egin zutela Gasteiz hiribideko supermerkatu batean. Dirudienez, gizon bat zenbait produktu ordaindu gabe saltokitik irteten saiatu zen eta, langileek harrapatu eta hura geldiarazi nahi izan zutenean, eraso egin zien eta produktuekin alde egitea lortu zuen.

   Tokira bertaratutako patruilako agenteek salatzaileek lapurrari buruz eskainitako deskribapenarekin bat egiten zuen gizon bat ikusi zuten inguruetan. Ertzainek hura identifikatu eta atxilotu zuten, lapurretaren egilea zela baieztatu ostean.

   Bestalde, arratsaldeko 18:30ak jota zirela, Gasteizko erdialdeko merkataritza-gune batetik agenteak bidaltzeko eskatu zuten, 600 euro balio zuen jantzi bat lapurtzen saiatu zen gizonezko bat atxikita zutelako. Merkataritza-gunera heldu zirenean, agenteak segurtasuneko zaindariekin harremanetan jarri ziren eta baieztatu zuten gizonezkoak jantziak zeraman alarma kendu zuela. Beharrezko egiaztapenak burutu ostean, gizonezkoa atxilotu egin zuten.