EUSKADI.-Duela lau egun desagertutako Abadiñoko (Bizkaia) gizon baten bila dabil Ertzaintza

BILBO 17 Mar. (EUROPA PRESS) -

Duela lau egun desagertu zen Abadiñoko (Bizkaia) 70 urteko gizonezko baten bila ari da Ertzaintza. Emaztearekin eztabaidan aritu ostean alde egin zuen; liskarrean, emaztea jo zuen. Desagertutakoa diabetikoa da eta buru-ahalmenak ez ditu bere onenean, Eusko Jaurlaritzako Herrizaingo Sailak gaur jakinarazi duenez.

Gines Romero, 70 urteko Abadiñoko gizonezkoa, joan den ostiralean desagertu zen, martxoaren 12an, emaztearekin eztabaida gogorra izan ostean; liskarrean gizonak hainbat objekturekin eraso egin zion. Emakumezkoak lesioak jasan zituen eta, hortaz, osasun-zentro batera eraman behar izan zuten.

Desagertutakoa diabetikoa da eta egunero hartu behar du bere medikazioa. Halere, desagertu zen unean ez zeraman medikaziorik. Gainera, gizonezkoak buru-ahalmenak ez ditu bere onenean. 'Diogenesen sindromea' delakoa pairatzen du, eta gaixotasun horrek edukiontzi, zaborrontzi eta zabortegietan objektuak bilatzera bultzatzen du; bereziki, industrialdeetako inguruetatik ibili ohi da.

Desagertzearen unean, Gines Romerok prakak, txamarra eta txapela zeramatzan, guztiak urdin kolorekoak. 1,75 metroko altuera du eta gorpuzkera ertain-handikoa da. Gizonezkoa non dagoen argitzen lagun dezakeen informazioren bat duten pertsonak Durangoko ertzainetxearekin (94 466 93 00) edota SOS Deiak-ekin (112) harremanetan jar daitezke.