Aviso: Esta noticia tiene más de un año. Última actualización: 10/03/2010 10:39
Guztira 200 zuhaitz landatuko dituzte datozen egunetan Gernika-Lumoko (Bizkaia) 150 ikaslek Oka errekaren hegalean, Errenteria auzoan. Zuhaitzok 35 urki, 35 lizar, 30 gereziondo eta 100 haltza izango dira, eta Uharte kalea amaitzen den puntutik Gola errekara arte dauden 400 metroetan landatuko dituzte, Zuhaitz Eguna aitzakitzat hartuta, inguruaren bioaniztasuna berreskuratzen laguntzeko.
Hain zuzen, Bioaniztasunaren Nazioarteko Urtea izendatu dute 2010, eta ikasle gernikarrak bihar, ostiralean eta martxoaren 17an aterako dira kalera Mertzedetik, Seber Altube eta institututik, eta San Fideletik, hurrenez hurren.
Aloña Arronategi Gernika-Lumoko Udaleko Ingurumen zinegotziaren esanetan, "birlandatzea beharrezkoa izateaz aparte, ikasleak inplikatu eta kontzientziatzea da garrantzitsua guretzat, ikus dezatela euren eskuekin landatu dutena zelan hazten den, konturatu daitezela beraien esku ere badagoela etorkizuna ereitea".
Urtero bezala, Urdaibai Fundazioko adituen laguntzarekin ariko dira ikasleak zuhaitzak landatzen, era egokian, eta urte luzetan zutik irauteko moduan. Bizkaiko Foru Aldundiaren laguntzarekin lortu dituzte lizarrak, urkiak eta gereziondoak; 100 haltzak, berriz, Gernikako Ingurumen Sailak eskuratu behar izan ditu, Aldundiak espezie horretako zuhaitzak banatu ez arren, Oka erreka hegalean landatzeko egokiak direlako.
Izan ere, Gernika-Lumoko Ingurumen Saila errekako bioaniztasuna berreskuratzeko lanean ere ari da, Urdaibai Fundazioagaz batera, joan den otsailean jakinarazi zuten moduan.