Orhipean parke tematikoak kulturarekin lotutako eskaintza izango du asteburu honetan Durangoko (Bizkaia) Landako Gunean

   Orhipean parke tematikoa egingo da bihartik igandera bitartean Durangoko (Bizkaia) Landako Gunean. Goizeko 10:30etatik gaueko 22:30etara irekita egongo den parkeak artisautzako produktuen eta nekazaritzako elikagaien merkatu baten egitura izango du, eta balio erantsi nagusia kulturarekin lotutako eskaintza izango da. Eskaintza haurrei, gazteei eta helduei zuzenduta dago eta sarrera doakoa izango da.

   Durangoko Udaleko iturriek jakinarazi dutenez, jarduera guztiak euskaraz egingo dira Kulturgunea izeneko espazioan. Diziplina anitzeko izaera duen espazio honetan parte-hartzaileek kultur ondarea ezagutzen eta identifikatzen ikasiko dute arte eszenikoen, arte plastikoen, literaturaren, kultura aniztasunaren, zinemagintzako lengoaiaren, historiaren eta musikaren bitartez, besteak beste.

   Kulturgunea espazioak proiektuaren edukiak publiko mota guztiari hurbiltzeko beharrezkoak diren baliabide teknologiko guztiak izango ditu. Horrela, pabilioian 4x3 metroko 'led' delako pantaila erraldoi bat jarriko da jarduera guztien garapena proiektatzeko.

   Horrez gain, haurrei eta gazteei zuzendutako espazioan honako hauek aurkitu ahal izango dira: Wii zonaldea, F1 simulatzailea, 'jumping'-a eta ludoteka erraldoi batez eta kalitate handiko puzgarriz osatutako haur parkea. Azkenik, bisitariak herritik parkera eramateko tren turistiko bat ere jarriko da.