Uns 2.000 empregados públicos protestan

SANTIAGO DE COMPOSTELA, 9 Feb. (EUROPA PRESS) -

Uns 2.000 empregados públicos --máis de 3.000 segundo os sindicatos-- protestaron este xoves en San Caetano, en Santiago, contra as medidas de recorte propostas pola Xunta en materia de función pública, entre as que se atopa a redución de xornada e non aboar o complemento ás persoas de baixa nos 21 primeiros días.

Os representantes dos catro sindicatos convocantes (CIG, CC.OO., UGT e CSIF) presentaron no rexistro da Xunta o escrito para pedir a retirada do Anteproxecto de lei de medidas no emprego público. No texto consideran que a proposta "vulnera os dereitos de negociación colectiva".

Os empregados públicos concentráronse dende antes das 12.00 horas na entrada principal de San Caetano e desprazáronse, tras unha pancarta con lemas como 'Non aos recortes dos nosos dereitos', ata a entrada posterior do edificio. Os asistentes cubrían todo o espazo entre o acceso traseiro á Xunta e a rotonda fronte á entrada da estación de autobuses.

Os manifestantes permaneceron concentrados uns minutos, mentres un grupo composto por un representante de cada sindicato presentou no Rexistro o documento, no que no que din á Xunta que as súas medidas son "procíclicas" e provocarán que se alongue a crise. "Son un ataque puro e duro contra os dereitos --dos empregados públicos-- e algúns contidos son anticonstitucionais", resumiu a representante da CIG, Carmen López Santamariña.

Ademais, indicou que esperan que, coas protestas e a petición de retirada do texto de función pública, o Goberno galego faga unha "reflexión". "Esperamos que vexan a contestación dos traballadores, que non están dispostos a aceptar a proposta que nos fan", sinalou e pediu "cordura" na mesa de negociación prevista para este venres.

O responsable do sector autonómico en CC.OO., Ramiro Otero, destacou a resposta "máis que exemplar" dos empregados públicos que participaron nunha protesta "convocada con carácter de urxencia". "Feijóo tense que reformular o que nos propón porque é unha atentado continuo contra o empregado público, pero tamén contra o estado do benestar; falamos do ensino ou a medicina", apuntou.

Por parte de CSI-F, o seu presidente, José Francisco Méndez, indicou que haberá folga se así decídeno os traballadores e avisou de que "tal como están a ir as cousas, nada é descartable". Ademais, criticou as propostas da patronal, que pide "reflexionar" sobre suprimir servizos públicos "prescindibles" ou privatizar os que teñan un "custo desproporcionado". "Queren levar os servizos públicos a como está a construción. Non o imos consentir", protestou.

Pola súa banda, o representante de UGT, José Vázquez, apuntou que, de confirmarse medidas en materia retributiva coa aprobación en marzo dos presupostos estatais, haberá "unha contestación" en toda España.

Os sindicatos de función pública teñen previstas novas protestas. O xoves 16 farán concentracións en todas as bisbarras, mentres que o día 23 --para cando a Xunta, apuntaron, quere aprobar en conselo o anteproxecto-- haberá manifestacións nas sete cidades.

MESA XERAL

Tamén protestarán este venres, coincidindo coa convocatoria da mesa xeral que convocou a Xunta ás 13.30 horas no edificio da EGAP. Nesa reunión, explicou Ramiro Otero, os sindicatos manteranse firmes na súa postura.

Ademais, recriminou a conselleira de Facenda, Elena Muñoz, que diga que ten "a man tendida" para o diálogo pero convoque "un venres ás 13.30 horas". "Se tivese ganas de negociar, chamaríanos con carácter de urxencia e tamén con tempo para argumentar", dixo.

ASEMBLEAS DE TRABALLADORES

Á protesta deste mediodía uníronse os participantes nas asembleas convocadas pola xunta de persoal e polo comité de empresa dos servizos centrais da Xunta. A presidenta deste último órgano, Pilar de Celis, subliñou a participación dos empregados públicos nas reunións. "Non cabían no salón de actos, estaban polos corredores", dixo.

As asembleas, que se convocaron nos centros de San Caetano e San Lázaro, repetiranse antes de 15 días, dado que o encontro deste xoves foi breve porque os traballadores decidiron unirse á protesta á que chamaron os sindicatos.

De Celis indicou que recolleron propostas dos empregados e traballarán nun documento de "contraproposta" para remitir á Xunta. Así mesmo, prevén que se produzan máis concentracións.