AMP.- A débeda de Galicia crece un 10,17% no segundo trimestre, ata os 7.627 millóns, o 13,3% do PIB

SANTIAGO DE COMPOSTELA, 14 Sep. (EUROPA PRESS) -

A débeda da comunidade de Galicia aumentou un 10,17% no segundo trimestre do ano, en relación ao mesmo período do ano anterior, e alcanzou os 7.627 millóns de euros, a cifra máis alta da serie histórica. Deste modo, representa o 13,3% do produto interior bruto (PIB), segundo os datos difundidos este venres polo Banco de España.

En todas as comunidades, a débeda creceu un 10,9% interanual no segundo trimestre, ata os 150.578 millóns de euros (o 14,1% do PIB), tamén neste caso, a cifra máis alta de toda a serie histórica.

Ademais, a débeda das comunidades autónomas experimentou un incremento do 2,8% respecto ao peche de 2011, cando se situou en 146.395 millóns de euros.

Os datos mostran que dende o ano 1995 o endebedamento das rexións non parou de crecer, batendo en cada exercicio marcas históricas, a pesar do compromiso de estabilidade presupostaria adquirido nos últimos anos.

Os datos do regulador indican tamén que a débeda do conxunto das administracións públicas alcanzou os 804.388 millóns de euros no segundo trimestre, o que equivale ao 75,9% do PIB, o seu nivel máis alto da serie histórica, que arranca en 1995.

No caso de Galicia, o endebedamento mantivo tamén unha senda crecente de forma ininterrompida dende 1995, cando representaba o 8,5% do PIB.

O aumento da débeda galega é do 3,33% en relación ao primeiro trimestre do ano, que rematou cun endebedamento de 7.381 millóns. Se se compara coa cifra do peche de 2011, a débeda galega creceu un 8,82%.

COMPARACIÓN CON OUTRAS COMUNIDADES

En termos absolutos, a débeda galega é a quinta máis elevada entre as comunidades autónomas, por detrás de Cataluña (43.954 millóns), Comunidade Valenciana (21.364 millóns), Comunidade de Madrid (17.108 millóns) e Andalucía (15.442). Galicia representa, deste modo, o 5,06% do total da débeda das autonomías.

Respecto á ratio entre débeda e PIB, Galicia rexistra a sexta máis elevada, por detrás das de Cataluña (22%), Comunidade Valenciana (20,8%), Castilla-La Mancha (18%), Illes Baleares (17,5%) e Navarra (15,6%).

Pola súa banda, a débeda das empresas públicas situouse en 228 millóns de euros no segundo trimestre do ano, a mesma contía que no mesmo período do ano pasado, pero un 1,3% por debaixo da do primeiro trimestre de 2012. Oito comunidades rexistran unha débeda menor que a galega neste ámbito. Esta cantidade representa o 0,4% do PIB, unha ratio que se mantivo estable dende 2009.