SANTIAGO DE COMPOSTEKA, 25 Jun. (EUROPA PRESS) -
O deputado do PPdeG Hipólito Fariñas asegurou que o Goberno galego non estaba presente "nos sillón azuis" do hemiciclo durante un debate sobre Pescanova porque "estaba a traballar" en lugar de "escoitar as parvadas -- parvadas -- " que se din -- sustentou -- en debates e de "perder o tempo".
Con todo, despois de que a presidenta en funcións, a socialista Marisol Soneira, o chamase a atención polo dito, Hipólito Fariñas, que pronunciou estas palabras despois das críticas do deputado socialista José Ramón Val Alonso pola ausencia de membros do Executivo, retirou esa expresión do diario de sesións.
Estas declaracións enfadaron aos grupos da oposición, aínda que só tiña réplica a autora da iniciativa, de forma que a deputada nacionalista Carme Adán manifestou que a "conclusión" do pleno deste martes para o PP é que hai que "disolver o Parlamento".
A parlamentaria do Bloque preguntouse se para os populares "estar no Parlamento non é traballar" e advertiu de que non acepta "leccións" sobre o que significa traballar.
Pola súa banda, a deputada socialista Patricia Vilán, aproveitando a presentación dunha ulterior moción, acusou de "insulto" escoitar que as palabras dos deputados son "retórica baleira ou falacias", e lamentou que, aínda que a mención a 'parvadas' fose retirada, o que transcende é que "os deputados non traballan e hai que reducilos". "Agora entendo a intención do PP de rebaixar deputados", censurou.
