Foto: MNG
Respecta a decisión de Táboas, pero defende que queden os demais porque son deputados cun programa electoral de consenso
SANTIAGO DE COMPOSTELA, 9 Feb. (EUROPA PRESS) -
O secretario xeral da Mocidade Nacionalista Galega (MNG) --xuventudes de Máis Galiza--, Paulo Carlos López, considera que esta corrente liderada por Carlos Aymerich "non ten espazo para desenvolverse como proxecto no seo do BNG", tal e como "están as condicións políticas e organizativas".
É a súa opinión "particular" sobre a decisión que a resposta á que Máis Galiza deberá contestar na súa asemblea extraordinaria do próximo 11 de marzo, cando se someterá a debate se esta corrente ten espazo político no seo da formación frentista tras a XIII Asemblea Nacional, celebrada a finais de xaneiro. Nela, a plataforma auspiciada pola UPG --Alternativa pola Unidade-- impúxose nas votacións das teses políticas e organizativas, así como na candidatura á Presidencia da Xunta e á Portavocía Nacional.
Con todo, nunha entrevista concedida a Europa Press, Paulo Carlos López matizou que os mozos de Máis Galiza non levarán unha postura en bloque ao conclave extraordinario que se celebrará o día 11 do próximo mes. "Non, non pretendemos actuar como bloque, sentímonos plenamente identificados con Máis Galiza e polo tanto, o máis lóxico e coherente, é que a xente, a título individual, dea a súa opinión libremente", manifestou.
O mozo militante engadiu que "non sería responsable actuar de forma colectiva e intentar marcar dende fóra unha posición política determinada". "Creo que o debate ten que ser o máis aberto posible, non temos que ir con decisións prefixadas, o que debemos facer é ver o que é mellor para o conxunto de Máis Galiza", reflexionou Paulo Carlos López.
Non obstante, o que si trasladará a MNG na asemblea de Máis Galiza será a súa decisión de abandonar Galiza Nova ou permanecer na militancia xuvenil do BNG, unha cuestión que resolverá o día anterior á asemblea da corrente liderada por Aymerich. "O que imos trasladar é a nosa posición sobre Galiza Nova, evidentemente isto pode ter un efecto arrastre sobre a nosa posición política no seo do BNG, pero cremos que o máis coherente (acerca disto último) é actuar de forma individual", explicou.
Paulo Carlos López rexeitou que a proposta unánime do consello Político de MNG de saír de Galiza Nova constitúa un pulso para Máis Galiza. "A MNG ten o seu ámbito de actuación xuvenil", defendeu o líder das Mocidades, quen revelou que hai unha "predisposición a abandonar" a organización xuvenil do Bloque.
DECISIÓN DE TERESA TÁBOAS
Sobre a decisión de Teresa Táboas e se considera que os demais deputados de Máis Galiza deberían seguir esa porta aberta, Paulo Carlos López considerou "lexítima" a determinación da exconselleira, pero tamén apelou "á tranquilidade" na toma de decisións.
Neste sentido, na entrevista concedida a Europa Press, defendeu que os deputados elixidos polo BNG "non o foron coas teses da décimo terceira asemblea do BNG, senón polo programa electoral co que concorreu ás eleccións de 2009" a organización nacionalista e no que, considerou, "todos se senten representados".
Ao respecto de se Máis Galiza opta por marchar do BNG iso debería levar consigo consigo deixar as actas de deputados, Paulo Carlos López apuntou que o debate do 11 de marzo é se hai espazo político" no Bloque, e se remitiu ás "resolucións" que se adopten ese día para concretar a súa postura ao respecto.
Ademais, o líder dos mozos de Máis Galiza descarta que a asemblea do Encontro Irmandiño, que terá lugar o próximo domingo, poida ter algún efecto sobre a corrente á que pertence no sentido de que se fraccione.
"Cada un sabe na organización que milita, sabe onde se teñen que dar os debates, pero eu descarto que haxa ningún efecto arrastre sobre a posición política que tome o Encontro", esgrimiu, para, a liña seguida, engadir: "Pode, en certa medida, que condicione o debate na asemblea, pero non restar militancia".