Foto: EUROPA PRESS
Avoga por un consenso con sindicatos e empresarios pero subliña, en caso non se lograr, que hai que facer algo xa"
VILAGARCÍA DE AROUSA, 8 Feb. (EUROPA PRESS) -
A conselleira de Traballo e Benestar da Xunta de Galicia, Beatriz Mato, subliñou a urxencia de aprobar a reforma laboral que promove o Goberno de Mariano Rajoy porque "España non pode perder máis tempo".
Para Beatriz Mato, o escenario ideal no que debería levarse a cabo esta reforma é o do consenso con sindicatos e empresarios. Pero, engadiu, "se iso non se produce, evidentemente, o Goberno deberá levala ao consello de ministros para a súa aprobación" porque "o que está claro é que temos que facer algo xa", apostilou.
A titular de Traballo e Benestar sinalou que "a reforma laboral é un piar imprescindible, aínda que non o único que necesita o país". "Despois, tamén teremos que falar da reforma financeira e doutros aspectos que me consta que dende o Goberno de España xa ese están a abordar", aseverou.
ACORDOS E CONSENSOS
Beatriz Mato lamenta que xa se perdera demasiado tempo "sen facer absolutamente nada do que se tiña que facer, que era buscar e propiciar acordos e consensos cos actores principais da reforma laboral".
Neste sentido, recordou que dende a chegada de Mariano Rajoy ao Goberno central "xa se alcanzaron algúns acordos importantes, para nada baladís", como os referidos á progresión do incremento salarial e á negociación colectiva, segundo indicou.