SANTIAGO DE COMPOSTELA, 1 Abr. (EUROPA PRESS) -
O Valedor do Pobo, José Julio Fernández, defendeu este martes o informe de Cáritas que sitúa a máis dun 20 por cento dos nenos galegos por debaixo do nivel da pobreza e deu "credibilidade" aos seus datos ao tempo que informou de que o Valedor ten en marcha unha investigación relacionada coa malnutrición infantil na Comunidade galega.
A preguntas dos xornalistas, José Julio Fernández sinalou que os datos de Cáritas teñen, a priori, "toda a credibilidade", dado que se trata dunha asociación de "referencia" coa que, ademais, traballa o Valedor á hora de solicitar información en cuestións sociais.
Nesta liña, Fernández apuntou que o Valedor ten en marcha dende hai dúas semanas unha investigación a raíz dunha queixa presentada pola existencia en Galicia de casos de desnutrición infantil.
O Valedor, que cualificou esta cuestión como de "máxima relevancia", explicou que a investigación está en marcha e que nun prazo de entre un e dous meses, coa información proporcionada por distintas entidades, poderá emitirse un informe.
