Abierta la matrícula de la Universidá Asturiana de Branu 2025 pa los cursos d'asturianu, traducción y teatru

   UVIÉU, 13 Jun. (EUROPA PRESS) -

   Ya ta abierta la matrícula pa la convocatoria de la Universidá Asturiana de Branu (UABRA) d'esti 2025, un espaciu d'enseñu llingüísticu y cultural intensivu nel que l'ALLA -en collaboración cola Universidá d'Uviéu y el Principáu- ufierta dellos cursos, xebraos en dos categoríes: formación llingüística xeneral y cursos d'afondamientu cultural y llingüísticu.

   Nesta edición, que va desenvolvese del 21 al 25 de xunetu, n'horariu de mañana, na Facultá de Filosofía y Lletres de la Universidá (El Milán), ufiértense tres cursos, tal y como esplica la Academia de la Llingua Asturiana n'ún comunicau de prensa esti vienres.

   Dientro de la formación llingüística xeneral el Cursu intensivu d'asturianu (B2), dirixíu pola profesora y académica Claudia Elena Menéndez, ta destináu a persones que, teniendo una conocencia elemental del idioma, quieran ameyorar el so nivel nos distintos planos comunicativos.

   Los dos cursos d'afondamientu cultural y llingüísticu son: 'La traducción al asturianu: teoría, práutica y nuevos retos sociales y teunolóxicos', dirixíu pola profesora y Académica Cristina Valdés, y 'El teatru asturianu. Del testu a la escena', dirixíu pol profesor Darío de Dios.

   Los tres cursos tienen 25 hores llectives nos 5 díes de docencia y tán reconocíos con 1 creitu ECTS per parte de la Universidá d'Uviéu y con 2,5 creitos de formación del profesoráu (pendiente de reconocimientu). La matrícula ta abierta hasta'l 18 de xunetu y pue facese na web de la Universidá d'Uviéu.