Barricada: "una de les característiques d'España ye'l grau d'estupidez qu'existe"

MADRID, 2 de Payares (EUROPA PRESS)

"Una de les característiques d'España ye'l grau d'estupidez qu'existe, dao que se sabe más de la biografía de Belén Esteban que de les nueses güeles", manifestó esti xueves El Drogas, líder de la banda de rock Barricada, por cuenta de la reedición el 7 d'avientu de 'La tierra está sorda' y de la publicación de la biografía del grupu, 'Barricada. Electricaos'.

Según esplicó la banda na presentación, la nueva edición d'esti álbum consiste nun discu llibru de 110 páxines con dos discos y un DVD. Los dos CDs son el discu orixinal y 'En La Memoria', con trece temes del conciertu acústicu qu'ofrecieron el 19 de marzu del 2010 en Zafra (Badajoz), mientres que'l DVD ye un documental de 41 minutos d'esi mesmu conciertu, cuatro cantares grabaes y otros seis temes de l'actuación en Zarautz (Guipúzcoa) del 28 d'agostu.

El Drogas señaló que la idea del conciertu de Zafra surdió dempués d'una serie de "charres acústiques" que realizaron en dellos institutos. Una especie de "clase d'historia" nes que dieron la oportunidá de contar la so esperiencia a persones que vivieron la represión del franquismu.

Per otru llau, el llibru, escritu por David Mariezkurrena y Fernando Garayoa, percuerre los 28 años de la banda al traviés de les opiniones y comentarios de xente como Rosendo, Loquillo, Fito, Marea, La Fuga, Andrés Calamaro, Joan Capdevilla, Hamlet, Iván Ferreiro o Carlos Tarque, ente otros munchos.

Alfredo Piedrafita, guitarrista de Barricada, indicó que se trata d'un "exerciciu de memoria" onde s'intentó recordar anécdotes y xente que pasó peles sos vides. Amás, aprovechen la ocasión pa esplicar asuntos que quedaren "poco escamplaes" cuando asocedieron y que siguen siendo "rumores", como la muerte de Mikel, el primer batería de la banda, por mor d'un derrame cerebral.

Al so xuiciu, n'España "al rock and roll nun lu trataron bien nunca". "Nun mos consideraron trabayadores, sinón como xente que se droga enforma y que lo pasa bien, asina que'l respetu que s'empieza a tener pola música significa que sumen estes lleendes", señala.

Amás, mientres esta xornada la banda recibió'l Discu d'Oru. Pa Javier Hernández, otru de los guitarristes de la banda, esta reconocencia ye la muestra de que "30.000 persones pasaron per caxa, algo que supón un luxu teniendo en cuenta los tiempos que cuerren".

"HAI QUE DESNUDASE MÁS"

Al respecto de la carta qu'Alejandro Sanz envió a Chávez pa tocar en Venezuela sin nengún peligru pal so equipu, el Drogas señaló que "ye necesario tener un sen críticu dende'l mundu de la cultura y de la creación".

Según indica, "alguién contestó-y que lo que tendría que facer ye poner más interés en cómo muerre Víctor Jara o les entraes a les universidaes, o como los militares poníen la pistola na vidaya de los cantautores".

El líder de Barricada añadió que "paez que ye fácil falar de Fidel Castro últimamente y sicasí les histories qu'equí asoceden pasen bien desapercibíes". Por ello, señala qu'anque "nun ye fácil facer autorretratos, pueen tener interés hasta ciertu puntu". "Hai que desnudase más, sinón esto ta perdío", calca.

Coles mesmes, llamentó qu'hai centros culturales que paecen "guetos", polo que considera que taría mui bien que s'abriere a grupos de rock, de teatru, de jazz, de blues, cuartetos de cuerda, poetes, escritores y conferenciantes de cualquier tipu, porque "nacemos con dos oreyes y una boca, ye pa sentir el doble de lo que falamos, y equí pasa lo contrario".

Barricada va zarrar la so xira de presentación de 'La tierra está sorda' con trés conciertos: 10 avientu na sala La Riviera de Madrid, el 11 en Pasaia (Guipúzcoa) y día 18 nel pabellón Anaitasuna de Pamplona. Dempués d'estos conciertos, el grupu tomará un descansu mientres un añu, según declararon.