Cines Embajadores entama n'Uviéu un ciclu de cine con películes sotitulaes n'asturianu

CINES EMBAJADORES FONCALADA

   OVIEDO, 18 Jun. (EUROPA PRESS) -

   Cines Embajadores Foncalada va poner en marcha en xunetu un ciclu de cine sotituláu n'asturianu, una iniciativa que busca averar el cine a la llingua asturiana y fomentar el so usu en nuevos contestos culturales y públicos. La propuesta, baxo'l nome 'Cine n'asturianu', incluirá proyeiciones de películes n'idioma orixinal con sotítulos n'asturianu y cuenta cola collaboración de la asociación Verbéu.

   Según esplicaron esti miércoles n'una nota de prensa, el ciclu va arrancar el llunes 30 de xunu y tien previstes cuatro sesiones n'Uviéu, toes elles a les 19.45 hores. Les películes programaes son:

   30 de xunu: All We Imagine as Night, un drama indi sobre dos muyeres que busquen un espaciu pa cumplir los sos deseos.

   7 de xunetu: Fallen Leaves, una historia d'amor ente dos trabayadores solitarios en Helsinki.

   14 de xunetu: En fanfare, una comedia francesa sobre dos hermanos separaos pola vida pero uníos pola música.

   21 de xunetu: The Substance, un thriller de ciencia ficción sobre la creación d'un alter egu perfectu con consecuencies inesperaes.

   Les entraes van tener un preciu de 3,5 euros, col oxetivu de facilitar l'accesu al cine de calidá y vincular la producción audiovisual cola cultura asturiana. La primer sesión va contar cola presencia de miembros de Verbéu, que van presentar el ciclu.

   L'organización destaca que la iniciativa busca dar visibilidá a la producción audiovisual n'asturianu y "normalizar la so presencia en espacios culturales estables". Verbéu collaboró nos procesos de sotituláu, asesoramientu llingüísticu y espardimientu.