El conseyeru niega fusiones de centros escolares y xustifica la reunificación de La Gesta I y La Gesta II

UVIÉU, 17 de Marzu (EUROPA PRESS)

El Conseyeru d'Educación y Cultura, Genaro Alonso, manifestó esti xueves nel Plenu que la conseyería nun tien previstes fusiones de centros públicos pal próximu cursu escolar 2016-2017 más allá de l'anunciada y yá decidida reunificación de La Gesta I y La Gesta II.

Insitió en qu'esta reunificación ye "una midida ordinaria nes competencies y la conseyería y estudióse", amás cola mesma consiguiráse una xestión más eficiente y eficaz de los recursos pa esti colexu de "más de 50 años y con numberosos servicios y espacios yá compartíos como'l comedor o'l salón d'actos".

Recordó que La Gesta I y La Gesta II yeren un únicu centru dende'l 57 al 70, segregando a los alumnos por sexos en dos ales distintes, polo qu'incidió en que lo previsto agora ye "una reunificación".

Genaro Alonso desmintió delles informaciones apaecíes al respective y esplicó qu'esta reunificación nun supón ampliación de places escolares, y tampoco ye cierto que va ser el mayor centru d'Asturies por númberu d'alumnos. Esplicó amás que yá hai previstes actuaciones como ampliación de comedor o eliminación de barreres. Añadió que yá se constituyó un equipu de trabayu pa llevar a cabu esta reunificación.

"Esta decisión entra dafechu nes competencies d'esta conseyería. Nun existe un plan de fusiones de colexos públicos pero si vamos ellaborar un plan de meyora de la rede de centros de Primaria. Dempués va llevase a cabu la de secundaria y de FP. Tamos abiertos al diálogu y vamos dar cuantes esplicaciones seyan precises pa la meyora de los centros docentes educativos", dixo'l conseyeru.

Genaro Alonso tamién calcó en que nun mintió a los padres d'alumnos, dao que tenía con ellos acordada y zarrada una entrevista y nel últimu momentu'l Ministeriu cambió-y una pa esi mesmu día "una xunta inaplazable". "Foi daqué sobrevenío y nun mentí. Manifiesto la mio disponibilidá a recibi-yos cuando faiga falta", añadió.

Alonso daba asina respuesta a una pregunta del diputáu de Ciudadanos, Nicanor García, sobre les fusiones ente centros docentes públicos pal próximu cursu escolar 2016-2017, como nel casu La Gesta I y La Gesta II d'Uviéu.

García indicó que-y preocupa qu'exista un plan por fases de fusiones de centros educativos y que s'enteraren pola prensa del mesmu. "Son noticies que se nos comuniquen con preocupación", dixo'l voceru de Ciudadanos, qu'insistió en que "nun tán en contra de les fusiones sinón que tán en contra de qu'estes se produzan con secretismu y cola metodoloxía inversa a la afayadiza".

Nicanor García indicó amás que los padres de los alumnos de la Gesta I y La Gesta II tienen tol derechu a que los informen de primer mano, lo que provocó l'aplausu de los padres que siguieron l'alderique dende la tribuna de convidaos. Los aplausos, repitíos en polo menos cuatro veces provocaron que'l presidente de la Cámara tuviera que facer dellos llamaos al orde.

Destacó qu'una fusión tien que tener siempre como oxetivu la meyora de la calidá educativo y que supongan meyores pa los alumnos ya indicó que si esa fusión supón un aforru de recursos los mesmos tienen de destinase a esi centru.

CRÍTIQUES A LA INTERVENCIÓN DEL PP

Alonso tamién respondió a una interpelación del 'popular' David Medina al que reprochó que la so intervención, "una vez más", nun se correspuenda colo plantegao per escrito. "Si quiero saber una cosa pregúntola directamente, nun-y faigo una emboscada", dixo Alonso, qu'indicó que la interpelación escrita refierse al estáu d'execución d'obres n'infraestructures educatives", mientres que la so intervención dirixóse a la fusión de centros.

"Como usté siendo tan mozu tien vicios tan vieyos. Pregunte usté que yo-y contesto, pero nun faiga una pregunta trampa", insistió Alonso, qu'esplicó amás qu'otros grupos plantegaron preguntes concretes sobre la rede de centros que "respuende prestosu".

Too ello porque David González Medina refirióse na so intervención inicial a la reordenación del mapa escolar, que ye al so xuiciu "un eufemismu porque lo que se fai ye una fusión o zarru de colexos", polo que pidió al conseyeru qu'esplique por qué tanta priesa en "esti retayu n'educación y por qué la falta de diálogu".

El comportamientu de Medina tamién recibió reproches del diputáu de Ciudadanos, Nicanor Fernández, que lu acusó de "enllamorgar el campu", asina como de la diputada d'IU, Concha Masa, que quizo facer un alegatu de defensa férreal de la escuela pública.

Más crítica inclusive foi la diputada de Podemos, Lucía Montejo, col comportamientu del diputáu del PP qu'al so xuiciu yá se repitió n'otres ocasiones.

Dende'l PSOE, Elsa Pérez, agradeció les intervenciones del restu de voceros y pidió al PP "llealtá". "Pregunte lo qu'usté considere oportuno, pero esa política trampona nun sorpriende porque ye la política del PP d'Asturies d'engañar y utilizar les preocupaciones de los asturianos pa sacar réditu político".