Los dependientes con una renta inferior a 517 euros nun van pagar los servicios prestaos

La residencia habitual sólo va tenese en cuenta na capacidá del beneficiariu nel casu de que necesite atención residencial

MADRID, 27 de Payares (EUROPA PRESS)

Les persones dependientes con una renta inferior al Indicador Públicu de Renta d'Efeutos Múltiples (Iprem), ye dicir, 516,90 euros, van quedar llibres del 'copagu' de la cofinanciación de les prestaciones y servicios de la Llei pa l'Autonomía Personal y Atención a les Persones en Situación de Dependencia, según acordaron güei'l Gobiernu y les comunidaes autónomes nel Conseyu Territorial de la Dependencia.

"Estos acuerdos garanticen les prestaciones y servicios de calidá d'acuerdu cola capacidá económica de les persones dependientes y, poro, naide va quedar fuera", aseguró la ministra d'Educación, Política Social y Deporte, Mercedes Cabrera, al acabar el Conseyu Territorial, p'añadir que con estos dos pautos "acaba'l desarrollu normativu de la llei de Dependencia", que s'aprobó hai casi dos años y que nun llograre'l consensu nestos dos temes.

De la mesma manera, l'alcuentru acabó col acuerdu sobre los requisitos de calidá de los centros y servicios del Sistema de Dependencia, referíos non sólo a les instalaciones y equipamientos, sinón tamién al personal. Sobre esti últimu términu, acordaron que nel 2015 el cien por cien del personal tenga un títulu o cualificación profesional, puesto que nesti momentu sólo lo posee un 30 por cientu.

En cuanto a les votaciones, l'acuerdu sobre'l 'copagu' resolvióse con diez votos a favor (les comunidaes autónomes goberantes pol PSOE y Navarra) y seis astenciones (les autonomíes del Partíu Popular y Canaries). Nesta votación nun participó'l País Vascu al nun tar presente. Pela so parte, los decretos que van fixar los criterios de calidá de los centros fueron acordaos con diez votos a favor (comunidaes del PSOE y Navarra) y siete astenciones (autonomíes del PP Canaries y País Vascu).

NUN CUENTA LA RESIDENCIA DEL DEPENDIENTE

En virtú de los testos firmaos güei, y referíos a la coparticipación de los beneficiarios de la llei, destaca l'atención a la so capacidá económica de los usuarios, relativa a la renta y el patrimoniu, teniendo en cuenta, de la mesma manera, la vivienda habitual.

Sobre esti últimu términu, comunidaes y Gobiernu fixaron que la vivienda sólo va contar pa determinar el nivel de 'copagu', nel casu de que'l serviciu que reciba'l dependiente seya d'atención residencial --o la prestación económica rellacionada a esti serviciu-- y nun tenga persones al so cargu que continúen viviendo na so casa.

Amás, acordaron pa los casos que la capacidá económica ye superior al Iprem, que cada comunidá fixe los índices de reducción, teniendo en cuenta que la prestación que reciba'l beneficiariu nunca va poder ser inferior al 40 opr cientu de la cuantía establecida añalmente pa la prestación económica rellacionada col serviciu y del 75 por cientu pa la de ciudaos nel entornu familiar. "Asina establecimos un regla del xuegu común qu'hai que cumplir", sorrayó Cabrera.

Poro, cumpliendo colos requsitos y llendes mínimes y máximes, les comunidaes van determinar la participación concreta de los beneficiarios na cofinanciación de los servicios y prestaciones que reconozan a los beneficios de la llei.