Entra en serviciu 'Ximielga.me', la primer rede social asturiana accesible en llingua, castellán y inglés

UVIÉU, 23 de Marzu (EUROPA PRESS)

La primer rede social asturiana, 'Ximielga.me', ponse en marcha col envís de tornar nuna ferramienta pa compartir información y conteníos en rede tanto en llingua asturiana, como en castellán y inglés.

Esta iniciativa desarrollóla 'Altuxa.com', alcuñu col que l'asturianu Mikel González entamó dende l'añu 2000 dellos proyectos n'Internet, na so mayoría rellacionaos cola creación de ferramientes web n'asturianu.

El sitiu web, que nació como una alternativa en llingua asturiana a les grandes redes sociales, preséntase col ánimu de ser "un puntu d'alcuentru n'Internet para tolos asturianos", tantu n'Asturies como en tol mundu, y pa ello ta disponible n'asturianu, en castellán y n'inglés, según informó'l so diseñador al traviés d'un comunicáu.

Pal desarrollu de 'Ximielga.me', Mikel González contó cola collaboración del colectivu pa la traducción y promoción del software llibre, Softastur, y de la trentena de blogueros que dende xineru vienen testeando la rede antes de la so abertura definitiva. Asina, 'Ximiélga.me ta basada na plataforma llibre 'Elgg'.

Esta nueva rede social ufierta al usuariu una serie de servicios bien asemeyaos a los incluyíos n'otres redes como'l 'microblogging', la creación d'álbumes de semeyes, la xestión d'enllaces, la integración de conteníos multimedia de sitios como Youtube, Dailymotion, Jamendo o Vimeo, o'l reductor asturianu de direcciones URL Acurti.es. D'esta manera, la rede asturiana ta pensada pa funcionar en tou momentu como 'aglutinador' d'usuarios d'eses otres redes.

Pa ello, 'Ximiélga.me' integra les sos funciones "mui fácilmente con Twitter o Identi.ca, y los conteníos de la rede asturiana puen publicase automáticamente en Facebook, MySpace o en sitios de noticies como Esbilla o Chuza!, ente otros", indicó'l so creador.