Huerta (IU) rectifica y pide disculpes a Graciano Torre y a la ciudadanía

OVIEDO, 19 Nov. (EUROPA PRESS) -

   El conceyal d'IU nel Conceyu d'Uviéu, Emilio Huerta 'Triqui', quiso atayar esta tarde'l discutiniu surdíu tres les sos declaraciones nuna rueda prensa na qu'atribuyó la propiedá de la empresa OCA Construcciones al conseyeru d'Economía y Empléu, Graciano Torre. El conceyal d'IU rectificó y pidió disculpes públicamente.

   "L'atribución de la propiedá de la empresa OCA Construcciones al Conseyeru Graciano Torre que yo afirmé foi un llamentable error pol que quiero pidir disculpes, tanto al citáu conseyeru como al conxuntu de la ciudadanía", señaló Emilio Huerta al traviés d'una nota prensa.

   Emilio Huerta dexó claro que nun tien "nenguna información" de que'l conseyeru o'l so fíu seyan propietarios, total o parcialmente, de nenguna empresa constructora nin de nenguna otra de cualquier naturaleza.

   Recordó que la rueda prensa taba convocada pa criticar los retrasos nes obres del Colexu Públicu, de resultes de les discrepancies ente la Conseyería d'Educación y la empresa OCA Construcciones y Proyectos, que foi axudicataria de delles obres promovidas pol Gobiernu d'Asturies.

   Según esplicó foi por ello, y "en tonu y ánimu informal" cuando fizo'l comentariu col enfotu de reprochar esos retrasos. "Ta claro que les mios afirmaciones, tovía con esi ánimu, fueron fondamente desafortunaes porque nun respuenden a la realidá", reconoció.

   Na nota de rectificación solicita que quede constancia de que nunca pretendió atribuyir a Graciano Torre un comportamientu inapropiáu, o faltu d'ética. "Verdaderamente l'afirmación que fice nun se correspuende a esa intención y por ello quiero repitir les mios fondes escuses que-y intentaré facer llegar personalmente al conseyeru en cuantes tenga oportunidá", acabó.