Llan de Cubel protagoniza la portada del 'Anuariu de la Música Asturiana'

GOXE PRODUCCIONES.

UVIÉU, 30 Ene. (EUROPA PRESS) -

El grupu de folk Llan de Cubel, que publicó apocayá'l so sestu discu; 'La lluz encesa', ye'l protagonista de la portada del 'Anuariu de la Música Asturiana'. La publicación, que yá se pue consiguir de baldre, afonda na escena musical a lo llargo del últimu añu con delles secciones.

Editáu por Goxe Producciones, l'Anuariu repasa lo que dio de sí'l 2019, con secciones qu'inclúin reportaxes, informes, entrevistes, crítiques, opinión, recoyida de material o anuncies.

El relevu xeneracional na escena sonora, la música como banda sonora de producciones audiovisuales, les rellaciones ente música y promoción turística o una crónica sobre'l XX Seminariu d'Estudios Asturianos de la Fundación Belenos, que tuvo dedicáu al celtismu musical son dalgunos de los temes, amás d'entrevistes a Llan de Cubel, Eva Tejedor, Silvia Quesada, Caldo y Os Rabizos y Cerezal.

El volume compleméntase con un discu con diecinueve cortes d'artistes y grupos como Fruela 757, Xuacu Amieva, Llan de Cubel, Cerezal, Eva Tejedor & Les Pandereteres, Nacho Vegas, Silvia Quesada, Ilustres Patilludos o Pop Piquiñín.

"UNA VERDADERA POLÍTICA D'APOYU"

L'Editorial del 'Anuariu' titúlase 'De les bones palabres a los fechos' y nél fálase de les espectatives, "a priori positives", que s'abren col equipu de la Conseyería de Cultura, Política Llingüística y Turismu, encabezáu por Berta Piñán.

Sicasí, recuerda que "sigue ensin dase una verdadera política d'apoyu, promoción y salida de la música asturiana per parte de les instituciones públiques, fundamentalmente de la Conseyería de Cultura, que ye la que tien que diseñala, presupuestala y desarrollala".

"Parez que cuerren aires políticos nuevos, con responsables y cargos na alministración que son conscientes y conocen la problemática d'esti sector, polo que ye de cortesía dayos un tiempu p'analizar el so llabor, pero ello nun quita pa que-yos faigamos alcordanza de la problemática que tien esta estaya tan significativa de la Cultura Asturiana", indiquen nel editorial.