La plantiya de Ence Navia retoma l'actividá hasta'l 12 de febreru y alvierte de fuelga indefinida si nun hai alcuerdu

   UVIÉU, 3 Feb. (EUROPA PRESS) -

   El presidente del Comité d'Empresa de Ence Navia, Javier García, anunció esti martes que nun llegaron a un alcuerdu cola dirección, pero abren un periodu de diálogu cola empresa hasta'l próximu 12 de febreru, polo que retomen l'actividá na factoría naviega. "Los díes 9 y 11 tenemos dos xuntes vitales. Si nun hai reposicionamientU de la empresa énte esta salvaxada que planteguen, vamos pasar a un modelu de fuelga indefinida", destacó en declaraciones a Europa Press.

   García almite que nun foi fácil pidir a los trabayadores que retomen l'actividá yá qu'hai muncho malestar al nun ver muncha voluntá per parte de la dirección de la empresa de revertir l'Espediente Regulador d'Emplegu (ERE) plantegáu, el cual afectaría a 96 trabayadores y que califiquen de suicidiu social.

   El Comité d'Empresa aportuna en que van llevar a cabu movilizaciones más agresives si dende la dirección de Ence nun camuden la posición.

   García fiZo un llamamientu a toles fuerces polítiques pa que manifiesten cuál ye la so posición y encamienta a un alderique públicu. Queremos que falen con claridá, qu'espliquen si quieren un futuru industrial pal Occidente asturianu o si acepten la precarización llaboral y el empobrecimiento del texíu económicu y social de la contorna, aprofió.

   Dende'l Comité d'Empresa aseguren tar fartos y esixen más compromisu a los representantes políticos, que materialicen con fechos el so sofitu. Queremos más que palabres. "Nun queremos partíos políticos que pongan l'alfombra colorada a la precarización, queremos que defendan los derechos de los trabayadores y qu'engarren por una sociedá más xusta", afirmó García.

   García denunció que los proyectos de Ence "quédense en papel moyáu y nunca lleguen a bon puertu. Son especialistes neso, reprochó, al empar qu'aseguró que nun cunten con nenguna garantía de que se vaigan a desenvolver nuevos proyectos na planta de Navia".

   Aportunó en qu'hai que defender el mayor emplegu posible y que, si deciden mover a Navia, por casu, la planta d'envases anovables, yá vamos falar. "Tamos falando d'un proyectu de 12 millones d'euros que nun sabemos nin qué impactu va tener. Fálase de cuatro allugamientos en diferentes puntos del país pa la so instalación. Xueguen al meyor postor, a ver ónde consiguen captar más ayudes. Esto ye solo un exemplu más d'anuncios que faen, pero que nun lleguen a materializase nin a xenerar un impactu llaboral positivu", criticó.