El Principáu declara 'alerta naranxa' en Trubia (Uviéu) y L.lena

UVIÉU, 8 Oct. (EUROPA PRESS) -

La Conseyería de Salú del Gobiernu asturianu declaró l'alerta naranxa na localidá de Trubia, n'Uviéu, y nel conceyu de L.lena. Según esplicaron dende la Conseyería, foi por encamientu de los epidemiólogos, al ver tases altes d'incidencia de coronavirus en dambes zones.

L'alerta naranxa, que s'activó pela primer vez esti branu en conceyos del oriente asturianu, ye, según les autoridaes sanitaries asturianes, un "semáforu" pa destacar les midíes de vixilancia, control y detección. La midida nun supón restricciones.

En Trubia planteóse esta midida en detectándose 10 casos na última selmana, que, anque nun tán toos rellacionaos, dispararon la tasa d'incidencia.

Per otru llau, en L.lena el númberu de casos ye eleváu depués del brotu en Xomezana Riba y alcontraron dellos positivos n'otres zones del conceyu.

Estes alertes, que van tener una vixencia de 14 díes, nun traen restricciones. Trátase d'un llamamientu a les instituciones locales, sectores socioeconómicos y a la ciudadanía pa que, de manera coordinada coles autoridaes sanitaries, realicen una vixilancia intensiva y estremen les midíes de protección y control.

Salú informó que se crearon comisiones de siguimientu colos conceyos d'Uviéu y L.lena, que yá s'aconceyaron esti xueves pela primer vez. La conseyería informólos de les actuaciones previstes.