El profesoráu d'asturianu suma la so denuncia a la fuelga y esixe reconocimientu como especialidá docente

   OVIEDO, 29 May. (EUROPA PRESS) -

   La Asociación de Docentes d'asturianu y gallego-asturianu (ADAE) volvió esti mes de mayu a denunciar públicamente la "situación llaboral intolerable" que vive'l profesoráu d'estes materies, ensin especialidá docente reconocida dende la implantación d'estes asignatures nel sistema educativu asturianu en 1984. D'esta manera suma la so voz a les movilizaciones convocaes polos sindicatos de la enseñanza pública n'Asturies.

   Dende ADAE reclamen al Ministeriu d'Educación y a la Conseyería d'Educación del Principáu un compromisu real pa modificar la normativa estatal (los reales decretos 1594/2011 y 1834/2008), lo que permitiría la creación d'una especialidá propia. "Tenemos la mesma formación y desempeñu que les nuestres compañeres, pero somos profesionales de segunda", indiquen nel comunicáu difundíu esti xueves.

   Aseguren que, a pesar de los intentos de negociación, l'actual situación ye frutu de la "falta de voluntá política" tanto de la alministración autonómica como estatal. "Llevamos dende'l cursu 84/85 siendo interinos de manera inexorable", recuerden.

   Al marxe d'esta reivindicación histórica, ADAE participa nes movilizaciones del conxuntu del profesoráu asturianu, denuncia la precariedá xeneralizada nel sistema educativu y súmase a les demandes comunes como la equiparación salarial, la reducción de carga burocrática y un nuevu alcuerdu de plantiyes pa estabilizar los equipos docentes.

   "La precariedá y el despreciu institucional deterioren la enseñanza", señalen, y anuncien que van siguir movilizándose "pola defensa d'una escuela pública de calidá", con especial atención al papel que xueguen les materies de Llingua Asturiana y Gallego-Asturiana nel sistema educativu.