Actualizado 01/12/2017 09:24 CET

El proyectu de presupuestos propón crear un SNL en Ribeseya y la homoxeneización de la normalización a nivel local

Genaro Alonso
GOBIERNO DE ASTURIAS

UVIÉU, 30 Nov. (EUROPA PRESS) -

El proyectu de presupuestos xenerales del Principáu d'Asturies pa 2018 inclúi partíes presupuestaries pa 17 servicios de normalización llingüística, ente ellos el de Ribeseya, que va ser de creación nueva. Pa la mayoría de servicios propónse una partida de 14.400 euros, lo que supón la homoxeneización presupuestaria ente toos ellos.

Asina se recueye nel proyectu de llei de presupuestos xenerales del Principáu d'Asturies pal 2018, qu'incrementa hasta los 1.677.000 euros la cantidá pa la normalización y promoción de la llingua asturiana, lo que significa una medría de 93.377 euros.

Ente les partíes recuéyese una de 273.280 euros pa los Conceyos, al traviés d'una tresferencia de 14.400 euros pa los servicios de normalización llingüística d'Avilés, Siero, Mieres, Llangréu, L.lena, Cangas, Samartín del Rei Aurelio, Corvera, Llaviana, Castrillón, Llanera, Grau-Candamo, Carreño (herederu del de la mancomunidá del Cabu Peñes) y Ribeseya, que sería de creación nueva.

Otra manera, el d'A Veiga (herederu del de la mancomunidá Oscos-Eo) y el de la Comarca de la Sidra recibiríen 15.840 euros, la mesma cantidá que recibiría el de la Fundación Parque Histórica del Navia, qu'axunta a una parte importante de los conceyos onde se fala gallego-asturianu. Amás, existen 40.000 euros destinaos a campañes de normalización a nivel local.

Otra manera, los Premios Lliterarios n'asturianu del Gobiernu d'Asturies pasaríen de 3.000 euros en cada categoría -novela, poesía, ensayu, lliteratura infantil y xuvenil y cómic- a 5.000. Tamién s'inclúi una partida nueva pa la xira del I Premiu de Teatru n'asturianu 'Nel Amaro' y una medría de 10.000 pal presupuestu de l'Academia de la Llingua

Per otru llau, una de les partíes más polémiques ye los 70.000 euros pa la promoción del idioma RTPA, una cantidá que yá recibió les crítiques de les principales asociaciones de reivindicación llingüística, como la Xunta pola Defensa de la Llingua o Iniciativa pol Asturiana, que defenden que la cadena tien que producir formatos n'asturianu col so propiu presupuestu. Nesi sentíu, la Xunta solicitó a la Conseyería de Cultura que pa xustificar esta partida firmara un conveniu con RTPA y dedicar esi presupuestu al doblaxe de dibuxos animaos.

N'otru orde de coses, ún de los oxetivos principales de la Dirección Xeneral de Planificación Llingüística pa esti 2018, según queda recoyíu nos oxetivos del presupuestu, ye que l'asturianu quede homologáu dientro del Marcu Común Européu de Referencia pa les llingües, que mide'l nivel de comprensión y espresión oral y escrita nuna determinada llingua. Una situación que permitiría acreitar el nivel d'asturianu de les persones adultes d'una manera oficial.

Asturianu ofrecido por