Reinu Xuníu va sustituyir a Ucrania y va ser la sede d'Eurovisión 2023

MADRID 25 Jul. (EUROPA PRESS) -

La Unión Europea de Radiodifusión (EBU, poles sos sigles n'inglés) y la cadena británica BBC confirmaron esti llunes que'l certame d'Eurovisión 2023 va tener llugar en Reinu Xuníu, que reemplazará a Ucrania como sede pal festival.

"Como resultáu de les distintes conversaciones, l'EBU convidó a la BBC, que quedó en segundu llugar nel festival de 2022, a actuar como organizador del 67 Festival d'Eurovisión", indicó l'organismu nun comunicáu.

Asina, señaló que "Ucrania, como país ganador l'añu pasáu, automáticamente va pasar a la final del próximu certame al pie de los cinco grandes", indicó en relación colos Estaos que más contribúin económicamente al festival: Francia, Alemaña, Italia, España y Reinu Xuníu.

La decisión, esplicó la entidá, foi tomada "tres eplorar la idea de qu'Ucrania pueda acoyer el festival" en plena invasión rusa del territoriu, daqué que quedó refugáu por cuenta de la imposibilidá de garantizar la seguridá de los asistentes.

"Como resultáu, la BBC foi convidada a actuar como güéspede del festival", recueye'l documentu. El director executivu del mesmu, Martin Osterdahl, dixo que la BBC cunta con esperiencia a la hora d'entamar el festival, tamién en casos nos que los ganadores nun podíen sacar alantre'l concursu.

Asina, manifestó que "como parte de la so tradición de solidaridá, la competición del añu que vien va amosar la creatividá d'una de les más esperimentaes cadenes públiques d'Europa al tiepu que garantiza que los ganadores, Ucrania, celebren la so victoria".

El logu va ser escoyíu más palantre y "va representar el momentu únicu que supón el festival l'añu que vien", amás de sirvir de reflexu de la cooperación de Reinu Xuníu con Ucrania".