Unicaja Banco y Liberbank xuben más d'un 3% en Bolsa depués de presentar resultaos

MADRID, 2 Feb. (EUROPA PRESS) -

Los títulos de Unicaja Banco y Liberbank remataron la sesión d'esti martes con ascensos perriba del 3%, impulsaos pol optimismu inversor depués de la presentación de resultaos del exerciciu 2020.

Les acciones del bancu andaluz xubieron un 3,6% nesta sesión bursátil nel Mercáu Continuu, hasta colocase en 0,59 euros, mentes que les de la entidá asturiana xubieron un 3,88%, asitiándose en 0,21 euros.

La xubida de dambos títulos producióse nuna xornada na que l'Ibex 35 xubió un 1,96%, hasta los 7.900 puntos, y na que los valores bancarios rellumaron especialmente, con Banco Sabadell (+7,14%), BBVA (+6,01%) y Banco Santander (+4,96%) a la cabeza del sector.

Esti martes conocióse que'l Grupu Unicaja Banco llogró un beneficiu netu de 78 millones d'euros al acabar l'añu 2020, lo que supón un descensu del 54,8% menos, n'efectuando una dotación estraordinaria de 200 millones d'euros pa cubrir el potencial impactu económicu del Covid-19.

Coles mesmes, Liberbank informó de que rexistró unes ganancies de 41 millones d'euros nel exerciciu 2020, un 63,1% menos qu'un añu enantes en destinando 241 millones d'euros a saneamientos.

Dambos bancos tamién comunicaron que depués de l'aprobación del Proyectu Común de Fusión poles cúpules de dambes entidaes, el procesu sigue avanzando según el calendariu previstu y que, pel momentu, nun existe nenguna torga a la vista.