Un xuez estaounidense ordena per primer vez lliberar n'EE.UU a 17 reteníos en Guantánamo

WASHINGTON, 8 d'Ochobre (Reuters/EP)

Un xuez federal n'EE.UU ordenó güei la lliberación de 17 chinos musulmanes reteníos na prisión militar de Guantánamo. El maxistráu Ricardo Urbina lleyó la resolución y confirmó les apellaciones de los miembros del grupu étnicu uigur, chinos de relixón musulmana, que solicitaben de la mesma manera'l permisu d'entrada de los sos miembros arrestaos n'EE.UU.

Nesti sen, el xuez esplicó que nun existe nenguna evidencia de que los deteníos, que lleven enzarraos casi siete años, seyan "combatientes enemigos" o supongan un riesgu pa la seguridá. Asina, recordó que la Constitución norteamericana torga l'arrestu indefiníu ensin causa.

Esta sentencia supón un nuevu golpe pa l'Alministración de George W. Bush, puesto que caltién que los xulgaos federales nun son competentes p'adoptar esti tipu de decisiones. Los abogaos de los 17 beneficiaos pola sentencia aseguraron que'l fallu marca un llogru al permitir a los lliberaos quedar n'EE.UU.

La organización 'Human Rights Watch' aplaudió nun comunicáu que "una vez más, un tribunal federal refugue la teoría de l'Alministración Bush de que pue saltar les apellaciones xudiciales y los derechos constitucionales". La vocera de la ONG, Jennifer Daskal, apuntó que los 17 deteníos por fin recibieron "l'auxiliiu xudicial que se merecen".